समीक्षा महिला बहुउद्देश्यीय सहकारीके १४ औं साधारण सभा

पहुरा समाचारदाता
हसुलिया, २९ अगहन । कैलारी गाउँपालिका वडा नम्बर ७ स्थित समीक्षा महिला बहुउद्देश्यी सहकारी संस्थाके सोम्मारके रोज १४ औं वार्षिक साधारण सभा सम्पन्न हुइल बा ।

कार्यक्रममे बर्का पहुना कैलारी गाउँपालिकाके अध्यक्ष लाजुराम चौधरी रहल रहिट । अध्यक्ष चौधरी सहकारी मार्फत गाउँघरमे रहल बेरोजगार युवाहुक्रनहे टमान मेरिक सीपमूलक तालिम डेके रोजगारी सृजना कैना जोड डेहल रहिट । उहाँ सहकारी मार्फत यहाँके कृषकहुक्रनके लाग कृषि सम्बन्धी कार्यक्रम फेन सञ्चालन कैना बटाइल रहिट ।

कार्यक्रममे वडा नम्बर ७ के वडाध्यक्ष कमलप्रसाद चौधरी फेन सहकारी मार्फत गाउँघरमे टमान व्यवसायमूलक काम करे सेक्ना बटैलै । उहाँ सहकारीसे सहुलियत दरमे ऋण सहयोग लेके यहाँ रहल वेरोजगार युवाहुक्रनहे व्यवसायमे लागे पर्ना जोड डेहल रहिट ।

कार्यक्रममे सहकारीके पूर्व अध्यक्ष कलावति चौधरी, कोषाध्यक्ष मुसम्पी चौधरी लगायत बोलल् रहिट ।

कार्यक्रममे सहकारीके लेखा परिक्षण प्रतिवेदन व्यवस्थापक पार्वती चौधरी सुनाइल रही । सहकारीके आर्थिक बरस २०७६/०७७ मे २ करोबार ३५ लाखसे उप्पर करोबार हुइल जनाइल बा ।

सहकारीके अध्यक्ष उर्मिला चौधरीके अध्यक्षतामे हुइल कार्यक्रममे स्वागत मन्तव्य उपाध्यक्ष विष्णु चौधरी करल रही । कलेसे कार्यक्रमके सञ्चालन सहव्यवस्थापक रमिला चौधरी करल रही ।

ओस्टके कार्यक्रममे वार्षिक कार्यायोजना सहसचिव सुलोचना चौधरी सुनाइल रही । सहकारीके ७५५ शेयर सदस्य रहल बाटै ।

सहकारीसे टमान सरकारी तथा गैरसरकारी संघसंस्थाके सहकार्यमे सीप ओ रोजगारमूलक तालिम यहाँके युवाहुक्रनहे डेटी आइल बा । ओस्टके समय समयमे कृषकहुक्रनहे फेन कृषि सम्बन्धी तालिम फेन डेटी आइल बा ।

सहकारीसे अब्बे मसला उद्योग ओ सेनरटी प्याड बनैना उद्योग सञ्चालन कैना तयारीमे रहल बा । कलेसे कृषकहुक्रनहे बीउ बिजन लगायत रसायनिक मलखाद फेन उपलब्ध करैटी आइल बा ।