रुख्वा कटानके आदेशपत्र पुग्नामे ढिलाई
पहुरा समाचारदाता
धनगढी, ९ चैत । कैलालीके बसन्ता वन क्षेत्रमे हुलाकी राजमार्ग विस्तारके लाग रुख्वा कटानके आदेशपत्र पुग्नामे ढिलाइ हुइल बा ।
बसन्ता वनस्थित दुई किलोमिटर क्षेत्रमे रहल एक सय रुख्वा कटानके लाग गैल फागुन २६ गते नै मन्त्रिपरिषद्से निर्णय करल रहे । मने, उ निर्णय हुइल दुई अँठ्वार बित्लेसे फेन हुलाकी राजमार्ग आयोजनाके कार्यालयमे पत्र नैपुगल हो ।
हाली पत्र प्राप्त नैहोके रुख्वा कटानके प्रक्रियाहे आघे बह्राइ नैसेकल आयोजनाके कार्यालय जानकारी डेले बा । ‘मन्त्रिपरिषद्से निर्णय कैसेक्लेसे फेन अब्बेसम हमार यहाँ पत्र नैपुगल हो,’ आयोजनाके इन्जिनीयर पदम मडै कहलै–‘पत्र नै आके काम आघे बह्रल नैहो ।’
ओइसीक टे, उ सडकखण्डमे राजमार्ग निर्माणमे ढिलाइ होसेकल बा । २०७३ मे उ खण्डमे राजमार्ग विस्तारके लाग ठेक्का हुइल रहे । मने, रुख्वा कटान आदेश प्राप्त नैहुइल कारण हालसम ट्रयाकसमेत खोलल् नैहो । उ खण्डमे काम कैना ढिला हुइलमे चालू आर्थिक बरसभित्रे राजमार्ग निर्माणके काम सम्पन्न नैहुइना मडै बटैलै ।
‘मन्त्रिपरिषद्से निर्णय करल कुछ दिनभित्रे रुख्वा कटानके काम हुइल रहट कलेसे चालू आर्थिक बरसभित्रे वहाँ हुलाकी राजमार्ग निर्माणके काम करे सेकजाइट,’ उहाँ कहलै, ‘मने, ढिला हुइटी गैल बा ।’ ढिला हुइलमे बर्खामे काम करे नैसेकजैना हुइल ओरसे चालू बरसभित्रे राजमार्ग निर्माणके काम सम्पन्न हुइना सम्भावना नैरहना मडै बटैलै ।
जम्मा १८ किलोमिटर बसन्ता बसन्ता वन क्षेत्रमे १४ किलोमिटर इहीसे आघे नै काम सम्पन्न होसेकल बा ।
