घोडाघोडी जेसिससे रक्तदान कार्यक्रम

पहुरा समाचारदाता
सुखड, १० भदौ । कैलालीके घोडाघोडी नगरपालिकामा–१, घोडाघोडी बहुमुखी क्याम्पसमे बृहत् रक्तदान कार्यक्रम सम्पन्न हुइल बा । प्रस्तावित घोडाघोडी जेसिसके आयोजनामे वृहत् रक्तदान कार्यक्रम सम्पन्न हुइल हो । रक्तदान कार्यक्रममे ७० युनिट रगत संकलन हुइल प्रस्तावित घोडाघोडी जेसिसके महासचिव कमल बहादुर बम जानकारी डेलै ।

नेपाल रेडक्रस सोसाइटी जिल्ला शाखा कैलाली ओ युवा रेडक्रस सर्कल घोडाघोडी बहुमुखी क्याम्पसके प्राविधिक सहयोगमे प्रस्तावित घोडाघोडी जेसिससे् रक्तदान कार्यक्रमके आयोजना करल हो ।

जिल्लामे रगतके अभावहे कुछ हदसम कम कैना उद्देश्यसे रक्तदान कार्यक्रम करल जनाइल बा । जेसिसके वार्षिक कार्यक्रम अनुसार रक्तदान कार्यक्रम करल प्रस्तावित जेसिस अध्यक्ष लाल बहादुर शाही बटैलै । रक्तदान कार्यक्रमसे रगत अभावके कारण ज्यान गुमाइ परल विरामीहे कुछ राहत पुग्ना उहाँ बटैलै ।

रक्तदान कार्यक्रममे नगर प्रमुख खडक बहादुर रावत, घोडाघोडी बहुमुखी क्याम्पस अध्यक्ष विष्णु प्रसाद सापकोटा, रेडक्रस सोसाइटी दरख उपशाखा प्रतिनिधि, जेसिसमे आबद्ध व्यक्ति, प्राध्यापक, प्रहरी, विद्यार्थी, जनप्रतिनिधि, युवा, व्यवसायी, विद्यार्थी लगायत टमान व्यक्तित्वहुक्रनके उपस्थित रहल रहे ।