समाज पथ प्रदर्शकके रुपमे ‘निसाफ’
पहुरा समाचारदाता
धनगढी, १५ भदौ । पत्रकार उन्नती चौधरीसे लिखित ‘निसाफ’ लेख संग्रह विमोचन करल बा ।
बुधके एक कार्यक्रमके बिच सुदूरपश्चिम विश्व विद्यालयके पूर्व राजिष्टार एवं शिक्षाविद् डा. हेमराज पन्त बिमोचन करल हुइट । विमोचन कार्यक्रमके वक्ताहुक्रे निसाफ लेख संग्रहहे समाजके पथ प्रदर्शकके रुपमे व्याख्या करल रहिट ।
कार्यक्रमके बर्का पहुना समेत रहल डा. पन्त निसाफहे एकठो प्राज्ञिक महत्व बोकल लेख संग्रहके संज्ञा डेहल रहिट । साथे उहाँ थारु समुदायके समाजशास्त्रीय ओ मानवशास्त्रीय अध्ययन करे चहुइया विद्यार्थी तथा पाठकहे महत्वपूर्ण सन्दर्भ सामग्री रहना बटाइल रहिट ।
नाष्ट कलेजके प्रवन्ध निर्देशक शिवहरि मुडभरी निसाफ थारु लोक कला तथा ज्ञानके हस्तान्तरणमे सहयोग पुगैना बटाइल रहिट । कैलाली बहुमुखी क्याम्पसके पूर्व क्याम्पस प्रमुख सुरेन्द्र चन्द निसाफ समाजमे पथ प्रदर्शकके भूमिका खेल्ना बटाइल रहिट ।
निसाफ लेख संग्रहमे लेखिका चौधरी आपन जीवन संघर्षहे प्रस्तुत करले बाटी । उहाँ लैङ्गिक हिंसा, महिला हिंसा लगायत थारु समाजके संस्कृति, रीतिरिवाज, चाडपर्व, पारिवारिक जीवन, कमैया प्रथा, युगौँसे हुइटी आइल शोषण ओ राजनीति लगायत अन्य सामाजिक ओ आर्थिक पक्षहे प्रस्तुत करले बाटी ।
केर्नी मिडिया प्रालिसे प्रकाशित ‘निसाफ’ लेख संग्रहके मुल्य रु.५०० रहल बा । मने भदौ महिनाभर कितावके मुल्यमे ५० प्रतिशत छुटके व्यवस्था करल जनाइल बा ।
कार्यक्रममे महिला अधिकारकर्मी गोमा आचार्य, थारु विद्यार्थी समाजके केन्द्रीय उपाध्यक्ष ठाकुर प्रसाद करिया प्रधान, सुदूरपश्चिम साहित्य समाजके महासचिव गणेश नेपाली, नेपाल पत्रकार महासंघ कैलाली अध्यक्ष हिमाल जोशी, कैलाली जनपुस्ताकालयके अध्यक्ष डा. टीएन जोशी, थारु नागरिक समाजके सदस्य बसन्ती चौधरी लगायत शुभकामना मनतब्य राखल रहिट ।
कार्यक्रम केर्नी मिडियाके अध्यक्ष तथा लेखिका उन्नती चौधरीके अध्यक्षतामे हुइल रहे । कार्यक्रममे पत्रकार लखन चौधरी स्वागत मनतब्य राखल रहिट कलेसे सञ्चालन सानु चौधरी करले रही ।
