समाचार फिचर लेखन सम्बन्धी प्रशिक्षण

पहुरा समाचारदाता
धनगढी,१६ भदौ । टमान संचारमाध्यममे कार्यरत पत्रकारहुकनके लेखनमे ठप निखारटा नानेक चार दिने समाचार फिचर लेखन सम्बन्धी प्रशिक्षण धनगढीमे सुरु हुइल बा ।

इन्टरनेशनल एर्लटके आर्थिक सहयोग, यूरोपियन यूनियनके प्राविधिक सहयोगमे नेपाल पत्रकार महासंघ केन्द्रके आयोजना ओ जिल्लाके संयोजनमे समाचार फिचर लेखन सम्बन्धी प्रशिक्षण डेजैटी रहल बा । नेपाल पत्रकार महासंघ कैलालीके अध्यक्ष हिमालय जोशीके अध्यक्षतामे हुइल तालिम उदघाटन कार्यक्रममे नेपाल पत्रकार महासंघ केन्द्रके कार्यक्रम व्यवस्थापक रामप्रसाद दहाल कार्यक्रमबारे जानकारी डेहल रहिट ।

कार्यक्रममे संचालन नेपाल पत्रकार महासंघ कैलालीके सचिव प्रेम चौधरी ओ स्वागत मन्तव्य जिल्ला उपाध्यक्ष हरिश विक कैले रहिट । टमान संचारमाध्यममे कार्यरत धनगढीके अत्तरिया करके २५ जानेक सहभागितामे हुइटी तालिमके प्रशिक्षण अग्रज पत्रकार मनमोहन स्वाँर प्रशिक्षण डेटी रहल बटै ।

ओस्टेक करके यी तालिम लम्कीचुहामे संचालन कैना नेपाल पत्रकार महासंघ केन्द्रके कार्यक्रम व्यवस्थापक दहाल बटैलै । यिहीसे आघे नेपाल पत्रकार महासंघसे कैलालीके लम्कीचुहा ओ धनगढीमे यिहे मेरिक तालिम संचालन करल रहे । कलेसे यिहीहे एडभान्स तालिमके रुपमे फेरसे संचालन कैगिल हो ।