लडियामे डुबके दुई वेपत्ता, एक ठो बेवारिसे लाश फेला

पहुरा समाचारदाता
धनगढी,१६ भदौ । कैलालीके मोहना लडियामे डुबके दुई जाने बेपत्ता हुइल बटै । धनगढी उपमहानगरपालिका–३ ओ १९ मे लडियामे डुबके दुई जाने बेपत्ता हुइल प्रहरी जनैले बा ।

जिल्ला प्रहरी कार्यालयका प्रवक्ता प्रहरी नायब उपरीक्षक(डीएसपी) वेदप्रकाश जोशी धनगढी–३ मे स्थानीय मोहन रानाके छावा १० वर्षीय प्रिन्स ओ धनगढी–१९ स्थित मोहना लडियामे २७ वर्षीय माने कना रिसमान चौधरी लडियामे डुबके बेपत्ता हुइल जानकारी डेलै । लडियामे डुबके बेपत्ता हुइल दुने जानेक खोजी कार्य हुइटी रहल प्रहरी जनैले बा ।
ओस्टेक करके कैलालीके भजनी नगरपालिका वडा नं. ०३ कुसुमघाट स्थित मोहना लडियामे एक महिलाके बेवारिसे लास फेला परल बा ।

लडियामे बुटेदार हरियर निला रङके मेक्सी, निला ब्लोज लगाइल छोट पाकल भुटला रहल अन्दाजी ७०÷७५ बर्षके महिलाके मृत लास मोहना लडियामे पुहटी रहल अवस्थामे भेटल बा ।

स्थानीयहुक्रे उ लास डेखलपाछे प्रहरी समेतके सहयोगमे उ ठाउँसे निकारके घटनास्थल लगायतके कार्य पुरा करके टिकापुर अस्पताल टिकापुरमे धारल जिल्ला प्रहरी कार्यालय कैलाली जनैले बा । नाउँ, थर, ठेगाना खmुे नइआइल उ हुलिया रहल महिलाहे चिन्हुइयाहुक्रे कैलाली प्रहरी वा ईलाका प्रहरी कार्यालय टिकापुरमे जानकारी करके सहयोग करडेना आग्रह करल बा ।