नागरिक उन्मुक्ति पार्टी बल्गर बन्टी

प्रभावशाली नेताहुकनके पार्टी प्रवेशसंगे जनमत बह्रटी

पहुरा समाचारदाता
धनगढी,१७ भदौ । कौनो समय अइसिन रहे, नागरिक उन्मुपक्ति पार्टीप्रति कोईफे विश्वास नइकरे । पार्टी दर्ता हुइलक दुई महिनामे स्थानीय तह चुनाव हुइल ओम्ने कैलालीमे सबसे भारी दल बनके खडा हुइल ।

पार्टीके प्रवक्ता दामोदर शर्मा पण्डित पहुरासंग कैगिल बाटचितमे कहलै, ‘पहिले पार्टीके मनैन खोजना विजली बारे पर्ना अवस्था रहे । अब्बे नागरिक उन्मुक्ती पार्टीप्रति जनताके विश्वास ह्वाटे बह्रल बा ।’

स्थानीय चुनावमे कैलाली जिल्लाके चार पालिकाके प्रमुखसहित ९९ सितमे विजय हुइलपाछे भारी दलके छक्का छुटल प्रवक्ता पण्डित बटैलै । स्थानीय तह निर्वाचनपाछे अपन पार्टी दैनिक रुपमे प्रशिक्षण, पार्टी प्रवेश कार्यक्रमे तिब्रता डेटी आइल उहाँ बटैलै । अभिनसम काँग्रेस, एमाले, माओवादी, राप्रपा, लगायत भारी दलके प्रभावशाली नेता नागरिक उन्मुक्ती पार्टीमे प्रवेश कैसेकल ओरसे अपन पार्टी हाली यिहे प्रतिनिधिसभा ओ प्रदेश चुनाव राष्ट्रिय पार्टी बन्ना उहाँ दाबी करलै ।

उ पार्टीके नेता लक्ष्मण थारु अइना निर्वाचनसे नागरिक उन्मुक्ति पार्टी देशके वैकल्पिक शक्ति बन्ना दाबी करटी उहाँ प्रदेशके ५, ७ ओ २ मे अपन पार्टीके सरकार बन्ना बटैलै ।
विफेक रोज केल प्रभावशाली नेताहुक्रे एमालेके सुदूरपश्चिम प्रदेशसभा सदस्य रतन थापा नागरिक उन्मुक्ति पार्टीमे प्रवेश करले बटै । थापा एमाले कैलालीके पूर्व अध्यक्ष हुइट । थापा अपने २२ वर्ष एमालेमे विटाइल कहटी जनताके भाग्य ओ भविष्य बदलेक लाग एमालेसे कुछ करे नइसेकल आरोप लगैलै ।

ओस्टेक एमालेके पूर्वसांसद हिमाञ्चल भट्टराई, राष्ट्रिय प्रजातन्त्र पार्टीके केन्द्रीय सदस्य तथा पूर्व सांसद कैयालाल चौधरी, राजेन्द्र प्रसाद देवकोटा, राजाराम चौधरी, तेजराम चौधरी, लक्षीराम चौधरी लगायत नेता नागरिकता उन्मुक्ति पार्टीमे प्रवेश करले बटै । रिपोर्टर्स क्लब नेपालमे आयोजित पार्टी प्रवेश कार्यक्रममे पार्टी अध्यक्ष रञ्जिता श्रेष्ठ चौधरी सक्कुहुनहे स्वागत करल रहिट ।