फोहरहे मोहर बनैनासे लेके नगरहे हेरिटेज शहर बनैनासम
पहुरा समाचारदाता
टीकापुर, १७ भदौ । टीकापुर नगरपालिकासे सय दिनमे करल कार्य विवरण सार्वजनिक करले बा ।
बिफेक रोज एक कार्यक्रमके बिच सय दिनमे करल कार्य विवरण सार्वजनिक करल हो । टीकापुर नगरपालिकाके नगर प्रमुख रामलाल डगौंरा थारु कार्यभार सम्हारल दिनसे निरन्तर नगरके दिगो विकास तथा नगरबासीनके ईच्छा चाहाना अनुसार काम करल बटैलै । उहाँ नगरहे कैसिक आघे बह्राइ सेकजाइ कना बारेम टमान क्षेत्रके विज्ञहुक्रनसे छलफल कैके आघे बह्रल बटैलै ।
‘अपनेहुक्रे कार्यभार सम्हारल सय दिनमे जनताके असिमित इच्छा आकांक्षा अनुसार बरवार उपलब्धि करे नैसेकल रलेसे फेन कुछ महत्वपूर्ण निर्णय करले बाटी,’ मेयर डगौंरा कहलै–‘महत्वपूर्ण उपलव्धि हासिल कैके समयमे योजना तथा कार्यक्रम सम्पन्न कैना मेरके कार्य योजना बनैले बाटी ।’
उहाँ टीकापुर नगरपालिकाहे ओजरार बनाइक लाग नगर क्षेत्र भिट्टरके टमान चोक चौराहमे हलोजन लाईट जडान कार्यके थालनी हुइल बटैलै । उ बाहेक उज्यालो कार्यक्रम अन्र्तगत अभियानके रुपमे निरन्तरता डेके नगरपालिका भर विस्तार कैना योजना रहल जानकारी करैलै ।
‘फोहरहे दिर्घकालिन रुपमे व्यवस्थान कैनाके साथे फोहरहे मोहरमे परिणत कैना संघसंस्था संग समन्वय हुइटी रहल बा,’ डगांैरा कहलै–‘प्रदेश सरकारसंग समन्वय ओ सहकार्य कैके फोहोर व्यवस्थापनके लाग कार्य आघे बह्राब ।’
सडक किनार ओ सार्वजनिक स्थलमे अव्यवस्थित तरिकासे ढारल निमार्ण सामाग्री हटैना काम करल समेत उहाँ जानकारी करैलै । बर्षातके समयमे ढल निकासके समस्या होके बजार क्षेत्रमे डुबानके समस्या हुइना करल समस्याहे तत्काल समाधान कैना नगरपालिकासे अपने जेसिभि प्रयोग कैके मुहान निकास ओ ढलके सरसफाई कैना काम करल बटैलै । उहाँ नगर क्षेत्रमे बन्द अवस्थामे रहल शौचालयहे मर्मत सम्भार कैके पुनः संचालनमे लन्ना प्रक्रिया आघे बह्राइल बा । ‘अस्पताल लग्गे रहल मासु बिक्री सेन्टरहे उपयुक्त स्थानमे स्थानान्तरण कैके उ स्थानहे सिटी पार्कके रुपमे निर्माण कैना प्रकृया आघे बह्रैले बाटी,’ मेयर डगांैरा कहलै–‘बसपार्कके उद्घाटन कैके व्यवस्थित रुपमे टेण्डर प्रकृयासे सञ्चालन लन्ले बाटी ।’
नगरपालिकाके बजार क्षेत्रमे रहल खुल्ला सार्वजनिक स्थलहे हरियाली बगैंचाके नगर बनैना टमान बैंक, वित्तिय संस्था तथा सहकारी संग सहकार्य कैके संरक्षणके लाग पहल करल लगायतके महत्वपूर्ण काम करल उहाँ जानकारी कराइल रहिट ।
