सत्यनारायणहे संस्थापक अध्यक्ष माग कैटी फोनिजसे ज्ञापनपत्र

पहुरा समाचारदाता
धनगढी, १७ भदौ । नेपाल आदिवासी जनजाती पत्रकार महासंघ (फोनिज) कैलाली शाखासे नेपाल पत्रकार महासंघ कैलाली शाखाहे ज्ञापनपत्र बुझाइल बा ।

शुकके फोनिज कैलालीके अध्यक्ष राम दहितके नेतृत्वमे फोनिज कार्य समितिके पदाधिकारीहुक्रे पत्रकार महासंघके अध्यक्ष हिमाल जोशी ओ सचिव प्रेम चौधरीहे ज्ञापनपत्र बुझाइल हो । पत्रकार महासंघके संस्थापक अध्यक्ष स्व सत्यनाराण बहादुर श्रेष्ठ हुइट ओ श्रेष्ठहे संस्थापक अध्यक्ष घोषणा कैना माग कैटी पत्रकार महासंघ ओ सरकारहे दवाव डेना फोनिज संघीय समितिके निर्णय अनुसार फोनिज जिल्ला शाखा कैलालीसे पत्रकार महासंघ जिल्ला शाखा मार्फत् केन्द्रहे ज्ञापनपत्र बुझाइल हो ।

सरकार ओ पत्रकार महासंघसे स्व.कृष्ण प्रसाद भट्टराईहे संथापक अध्यक्ष मन्टी आइल बा । मने तथ्य ओ प्रमाणसे नेपाल पत्रकार संघ गठन कैके पत्रकारहे पहिलचो संगठित करुइया व्यक्ति सत्यनारायण बहादुर श्रेष्ठ रहल ओरसे फोनिजसे पत्रकार महासंघके अध्यक्ष श्रेष्ठहे घोषणा कैना माग कैटी आइल बा ।

विस २००८ बैशाख ९ मे श्रेष्ठके नेतृत्वमे नेपाल पत्रकार संघ गठन हुइल प्रमाण रहल बावै । वि.स २००९ बैशाख २८ गते श्रेष्ठके सभापतित्वमे नेपाल पत्रकार संघ पुर्नगठन हुइल रहे । वि.स २०१२ चैत्र २६ गते श्रेष्ठ अध्यक्ष ओ भट्टराई उपाध्यय भट्टराई सभापति हुइल रहिट । फोनिजसे बुझाइल ज्ञापनपत्रमे कहल बा, ‘वि.सं २०१२ चैत १६ गते नेपाल पत्रकार संघ पुनर्गठित हुइबर कृष्णप्रसाद उपाध्याय भट्टराई सभापति बनल तथ्य साँचो हो । उहाँके योगदानके हम्रे सक्कु जाने उच्च कदर करे परल, आदरभाव प्रकट करे परल ।’

ज्ञापनपत्र बुझैना कार्यक्रममे नेपाल पत्रकार महासंघ कैलाली सचिव प्रेम चौधरी, सदस्य कैलाश जोशी, फोनिज कैलाली शाखा सचिव सागर कुश्मी, सह–सचिव अनिता चौधरी ओ कोषाध्यक्ष प्रेमलाल चौधरीके उपस्थित रहल रहे ।