गौरीगंगामे पालिकासंग बालबालिका कार्यक्रम

पहुरा समाचारदाता
मसुरिया, १७ भदौ । कैलालीके गौरीगंगा नगरपालिकामे पालिकासंग बालबालिका कार्यक्रम करल बा । कार्यक्रममे बालबालिकासे नगर उपप्रमुख, वडा अध्यक्ष तथा महिला बालबालिका शाखाके प्रमुखसंग गौरीगंगा १० के वडा कार्यालयमे संवाद करले बटै ।

बालबालिकाहुक्रे लागु औषध प्रयोगके न्यूनीकरण, बाल श्रम निषेध, विपन्न बालबालिकाहे विद्यालय भर्ना तथा पढाई निरन्तरता डेना समस्या रहल ओ बालिकासे विद्यालय छोरना करल, अभिभावकसे बालबालिकाके क्रियाकलापमे ध्यान नइडेहल, बालबालिकाके क्षेत्रमे बजेट विनियोजन प्रकृया, बालदिवस, बालिका आत्मरक्षा, बाल मनोपरामर्शके साथे जोखिममे रहल बालबालिकाके सुरक्षा बारेमे जिज्ञासा राखल रहिट ।

बालबालिकाके जिज्ञासाके जवाफ डेटी गौरीगंगा नगरपालिकाके उपप्रमुख भोज बहादुर बम बजेट निर्माणमे बालबालिकाके सवालमे गम्भीरता पुर्वक योजना तय करल, लागुऔषध, बालविवाह, बालश्रमहे राज्यसे फे निषेध करल बटैटी ५ बर्ष भिटर बालमैत्री नगरपालिका बनैना करके कार्ययोजना बनाके लागू कैना बटैले बटै ।

महिला तथा बालबालिका शाखा प्रमुख भावना जोशी विगतमे नगरपालिकाहे छाउपडी गोठ मुक्त बनैना गोठ भत्कैना अभियान संचालन करलेसेफे कुछ समुदायमे मनसे हटाई नइसेकल, लागुऔषध सेवन कैना बालबालिकाके संख्यामे वृद्धि हुइटी रहल ओरसे यिहीहे न्यूनीकरण कैना प्रहरी कार्यालयसंग समन्वय करके विद्यालय तथा समुदाय तहमे अभिभावकहे समेटके जनचेतनामुलक कार्यक्रम कैना, बालिकाके लाग आत्मरक्षा ओ हिंसा विरुद्धके सचेतना कार्यक्रम संचालन कैना बटैलै ।

कार्यक्रममे वडा नम्वर १ के वडाध्यक्ष डबलबहादुर दियाकोटी मोबाइल प्रविधिके गलत प्रयोग ओ देखासिकीसे बालबालिका कुलत, कुसंस्कार ओ असामाजिक क्रियाकलापमे संलग्न हुइल पाइल उल्लेख करटी असल अभिभावकत्वके अभाव रहल बटैलै ।

वडा नम्बर १० के वडाध्यक्ष नरसिंह सार्की बालबालिकाके जिज्ञासांके जवाफ डेटी वडामे लागुऔषध, बालविवाह, छाउपडी प्रथा तथा जातिय छुवाछुत न्युनिकरणके सचेतनामूलक कार्यक्रम कैना बजेटके व्यवस्था करल जानकारी डेलै ।

वडा नं १० के अध्यक्ष नरसिंह सार्कीके अध्यक्षतामे करल कार्यक्रममे बाल कल्याण संघ टीकापुरके सामाजिक परिचालक प्रेम चौधरी कार्यक्रमके उद्देश्य बारे जानकारी डेहल रहिट ।

पत्रकार घनश्याम पौडेलसे संचालन करल कार्यक्रममे बाल कल्याण संघ टीकापुरसे छनोट करल २५ जाने बालबालिकाके सहभागीता रहल रहे । संवाद कार्यक्रम बाल कल्याण संघ टीकापुर, वर्ल्ड भिजन नेपालके आर्थिक तथा प्राविधिक सहयोग ओ आयोजनामे हुइल रहे ।