शिक्षा क्षेत्रमे सुधार नन्बीः अध्यक्ष राजसमझ

पहुरा समाचारदाता
हसुलिया, २१ भदौ । कैलारी गाउँपालिकाके अध्यक्ष राजसमझ चौधरी शिक्षा क्षेत्रमे सुधार नन्ना बटैले बटै ।

नेपाल राष्ट्रिय शिक्षक संगठन कैलारी गाउँपालिका कार्य समिति, कैलालीसे मंगर रोज बुझाइल ज्ञापनपत्र बुझटी उहाँ विद्यालय, शिक्षकहुकनके आवश्यकता बुझटी गाउँपालिकामे शिक्षा क्षेत्रमे सुधान नन्ना बटाइल रहिट । गाउँपालिका अध्यक्ष कहलै, ‘शैक्षिक सुधारके लाग विद्यालयके प्रअ, विद्यालय व्यवस्थापन समिति, राजनितिक दल, नागरिक समाजसे बैठकके छलफल कैबी । विद्यालयके अवस्थाबारे बुझना अनुगमन कार्यदल बनाके विद्यालयके अनुगमन हुइटी रहल बा । प्रतिवेदनसे आइल आवश्यकता अनुसार विद्यालयमे भवनफे बनाजाई ।’ उहाँ कहलै, ‘पालिकाके शिक्षामे लगानी कैना चाहना बा । शिक्षामे सुधार करही परी, डगरघाट हम्रे दुई पाछेफे बनाई सेक्जाई । मने शैक्षिक सुधार आवश्यक बा ।’

नेपाल राष्ट्रिय शिक्षक संगठन कैलारी गाउँपालिका कार्य समिति, कैलालीके अध्यक्ष रामसिह भुल, सचिव मनिराम चौधरीसे हस्ताक्षरित टमान बुदासहित गाउँपालिका अध्यक्ष राजसमझ चौधरीहे ज्ञापनपत्र बुझागिल बा । ज्ञापनपत्रमे विद्यालयमे कार्यरत शिक्षक कर्मचारीसंग विगतमे करल सहमति ओ सम्झौताके कार्यान्वयन करे पर्ना, तिनु तहके सरकार २० प्रतिशत रकम शिक्षामे विनियोजित करे पर्ना, शैक्षिक तथा भौतिक सुधारके साथे गुणस्तर अभिबृद्धि लाग पहुँचके आधारमे नइहुके आवश्यकताके आधारमे योजना छनौट करे पर्ना माग करल बा ।

ओस्टेक करके संगठनसे ज्ञापनपत्र मार्फत सामुदायिक तथा संस्थागत विद्यालयमे विविध निति, निर्देशन तथा कार्यक्रममे एक रुपता कायमके पहल करे पर्ना, शिक्षक सरुवाके नाउँमे शिक्षकहुकन उप्पर कैना ज्यादति तथा सौदावाजी बन्द करे पर्ना, पालिकागत रुपमे एसइइ, परिक्षा केन्द्र कायम करके ग्रेड बृद्धि परिक्षाफे पालिकागत केन्द्रमे कैना व्यवस्था मिलाई पर्ना माग करल बा ।