पाँचके मृत्यु, १० जाने बेपत्ता
पहुरा समाचारदाता
धनगढी, २५ भदौ । शुकके सुदूरपश्चिम प्रदेशके दार्चुलाके नौगाड गाउँपालिका–२, सल्ला गाउँमे आइल बाढ ओ पहिरोमे परके पाँच जनहनके ज्यान गैल बा ।
शुकके रात हुइल वर्षासे आइल बाढीपहिरामे परके ओइनके मृत्यु हुइल प्रहरी जनैले बा । जिल्ला प्रहरी कार्यालय दार्चुलाके निमित्त प्रमुख तथा प्रहरी निरीक्षक जगत गाहामगरके अनुसार महाकाली ३ के मानमती कार्की, महाकाली २ के नन्दराम बोहरा, नौगाड २ के मोहनराम पार्की, नौगाड १ के जानकी ठगुन्ना ओ धनमति ठगुन्ना रहल बाटै ।
जिल्ला प्रहरी कार्यालयके अनुसार बाढीपहिरोमे परके अब्बेसम १० जाने बेपत्ता हुइल बाटै कलेसे ८ जाने घाहिल हुइल बाटै । ३ महिला ओ ५ पुरुष सहित ८ जाने घाहिल हुइल हुइट । ओस्टके ४ महिला ओ ६ पुरुष सहित १० जाने बेपत्ता हुइल बाटै ।
प्रहरी ४२ घरमे पूर्ण क्षति, ९ घरमे आंशिक क्षति ओ ४० घर जोखिममे रहल जनैले बा । जेम्ने महाकाली नगरपालिकाके ६२ घर ओ नौगाड गाउँपालिकाके २९ घर रहल बावै । ओस्टके बाढसे एक विद्यालय पूर्ण क्षति, एकमे आंशिक क्षति ओ एक जोखिममे रहल ओ एक विद्युत पावर हाउसमे पूर्ण क्षति पुगल बा ।
ओस्टके २ ठो झोलुङ्गे पुल ओ १ मोटरेवल पुलमे क्षति पुगल बा । सवारी साधन ओर ६ जिप, कार, ट्याक्टर, जेसीबि १÷१ सहित जम्मा ९ वेपत्ता हुइल प्रहरी जनैले बा ।
ओस्टके पहिरोमे परके गम्भीर घाहिल हुइल ५ जनहनके नेपाली सेना हेलिकोप्टर मार्फत उद्धार करल रहिट । सुर्खेतसे आइल नेपाली सेनाके एयर एम्बुलेन्स मार्फत नौगाड गाउँपालिका–१ सल्लाके गम्भीर घाहिल ४५ बर्षीय बिरेन्द्र ठगुन्ना, ४० बर्षीय जयबहादुर ठगुन्ना, ३५ बर्षीया फागुनी ठगुन्ना, ३० बर्षीया रम्भा देवी ठगुन्ना ओ ३० बर्षीय देवसिंह ठगुन्नाके उद्धार करल हो ।
इहे बिच बाढीपहिरो प्रभावितहे राहत सामग्री वितरण करे मन्त्रीसहितके टोली दार्चुला गैल बा । उद्योग, वाणिज्य तथा आपूर्तिमन्त्री दिलेन्द्र बडू, सुदूरपश्चिम प्रदेशके आन्तरिक मामिला तथा कानुनमन्त्री डा. रणबहादुर रावल, सुदूरपश्चिमके वनमन्त्री मानबहादुर धामीसहितके टोली नेपाली सेनाके हेलिकोप्टरमार्फत गैल हुइट ।
