१ लाख १५ हजार जाने म्यादी प्रहरीके लाग भर्ना खुलल
पहुरा समाचारदाता
धनगढी,२६ भदौ । अइना प्रतिनिधि सभा ओ प्रदेश सभा निर्वाचनके लाग म्यादी प्रहरीमे भर्ना खुलल बा ।
देशभर १ लाख १५ हजार जाने म्यादी प्रहरीके लाग भर्ना खुलल हो । प्रहरी प्रधान कार्यालय नक्शालसे आज सूचना जारी करके भर्ना खुलल जानकारी डेहल हो ।
म्यादी प्रहरीमे भर्ना हुइना इच्छुकसे यिहे भदौ ३० गतेसे कुवाँर ६ गतेसम दरखास्त डेहे सेक्ना हुइल बटै । दरखास्त सक्कु जिल्लाके जिल्ला प्रहरी कार्यालयमे डेहे सेक्जाई । १८ वर्ष पूरा हुके ५४ वर्ष नइनाघल ओ साधारण लेखपढ करे जन्ना दरखास्त डेहे सेक्की ।
दरखास्त डेहुइया राजनीतिक दलके सदस्य नइरहल, आतंककारी संगठनके सदस्य नइरहल, फौजदारी अभियोगमे सजाय नइपाइल, गर्भवती नइरहल ओ आँखी माइनस २ वा प्लस २ से ढेर कमजोर नइरहलफे हुई पर्ना सूचनामे उल्लेख बा ।
कुवाँर ९ गतेसे १४ गतेसम छनौट प्रकृया सुरु हुई । कुवाँर २५ गते अन्तिम नतिजा सार्वजनिक कैना ओ कुवाँर ३० गतेसे कार्तिक ८ गतेसम तालिम डेना प्रहरी प्रधान कार्यालय नक्शाल जनैले बा ।
म्यादी प्रहरी प्रतिदिन ८६९ रुप्याके दरसे ४० दिनसमके पारिश्रमिक पैही । ओइने खाद्यान्न बापत एकमुष्ट ७ हजार २ सय रुप्या, पोशाक तथा अन्य सामग्री खरिद कैना ६ हजार रुपैयाँ (हिमाली जिल्लामे खटुइयाहे थप १ हजार) अइना–जइना खर्च १ हजार रूप्या ओ ३०० रुप्याके दरसे ४ दिनके खाजा खर्चफे पैना जनाइल बा ।
