‘बालबालिकाहे असल संस्कार सिकैना परिवारके महत्वूर्ण भूमिका’
पहुरा समाचारदाता
धनगढी, २७ भदौ । बालबालिकाहे असल संस्कार तथा सभ्य समाज निर्माणके लाग मार्ग निर्देशन कैना परिवार नै महत्वपूर्ण भूमिका खेले पर्ना सुदूरपश्चिम प्रदेशके सामाजिक विकास राज्यन्त्री टेकबहादुर रैका बटैले बाटै ।
सोम्मारके धनगढीमे हुइल सुदूरपश्चिम प्रदेशमे बालबालिकाके सवाल, नीतिगत व्यवस्था एवं भावि योजना कार्यदिशा विषय प्रदेश स्तरीय कार्यशालामे राज्यमन्त्री रैका असल संस्कार तथा सभ्य समाज निर्माण कैना ओ सामाजमे रहल गलत प्रवृतिहे निरुत्साहन कैना फेन घर परिवार भूमिका खेले पर्र्ना औंल्याइलै ।
‘बालबालिकाहे विशेष कैके घरपरिवार नै असल संस्कार ओ सभ्य समाज निर्माणके लाग गाइड कैना हो, समाजमे रहल असल बोलचाल, भाषा संस्कृतिबारे फेन घरपरिवार नै हो’, राज्यमन्त्री रैका कहलै–‘घरपरिवार आपन बालबालिकाहे असल संस्कार नैसिकाइल कारण अक्सर बालबालिका गलत डगरामे लग्ना करल बाटै, ओहेमार घरपरिवार नै असल संस्कार सिकैना जरुरी रहल बा ।’
राज्यमन्त्री रैका प्रदेश सरकार बालबालिकाके टमान सवाल, हक अधिकार लगायतके बिषयमे सम्बेदनशील रहल बटैलै । उहाँ बालबालिकानके हक अधिकारके लाग प्रदेशसे टमान कार्यक्रम फेन कैटी रहल बटैलै । उहाँ बालबालिकाहुक्रनके शिक्षा, स्वास्थ्य लगागत क्षमता विकाससे लेके आत्मरक्षा तालिम समेत सञ्चालन करल बटैलै ।
साथे राज्यमन्त्री रैका बालबालिकाहुक्रनके हक अधिकारके लाग प्रदेश सरकार, स्थानीय सरकार ओ बालबालिकानके क्षेत्रमे काम करुइया संघसंस्था एकजुट होके लागे पर्र्ना औंल्याइलै ।
प्रदेश सभा सदस्य तथा पूर्वमन्त्री पूर्णा जोशी बालबालिकाहुक्रनके बात सुन्ना तथा बालबालिकाहुक्रनहे निर्णय प्रक्रियामे सहभागिता कराइ पर्ना बटैली ।
प्रदेश सभा सदस्य दिल्लीराज पन्त घरपरिवारसे स्कूल लगायत सक्कु क्षेत्र बालमैत्री हुइ पर्नामे जोड डेलै ।
गौरीगंगा नगरपालिकाके नगरप्रमुख देवीदत्त कडेल भौतिक पूर्वाधारमे किल लगानी नैकैके बालबालिकानके मानसिक तथा शारीरिक विकासमे लगानी करे पर्ना जोड डेलै ।
इन्सेकके खडकराज जोशी बालमैत्री नीति निर्माण कैके बालबालिकानके हकअधिकारके लाग प्रदेश सरकार ओ स्थानीय सरकार महत्वपूर्ण भूमिका खेले पर्ना बटैलै ।
नेपाल पत्रकार महासंघ सुदूरपश्चिम प्रदेशके आयोजना तथा वल्र्ड भिजन इन्टरनेशनल नेपालके सहकार्यमे कार्यक्रम हुइल रहे । कार्यक्रम नेपाल पत्रकार महासंघ सुदूरपश्चिमके अध्यक्ष योगेश रावलके अध्यक्षतामे हुइल रहे कलेसे सञ्चालन महासचिव रामसिंह ठगुन्ना करल रहिट ।
कार्यक्रममे स्थानीय तहका प्रमुख, पत्रकार, बालबालिकानके हकअधिकारके क्षेत्रमे काम करुइया संघसंस्थाके पदाधिकारी, पत्रकारहुक्रनके सहभागिता रहल रहे ।
