विद्यालयमे बालअधिकार चेतना समुह गठन

पहुरा समाचारदाता
कञ्चनपुर,२७ भदौ । जिल्लाके बेलौरी नगरपालिका–२ जबदियास्थित लक्ष्मी मा.वि.मे बालअधिकार चेतना समुह गठन करल बा ।

अनौपचारिक क्षेत्र सेवा केन्द्र (इन्सेक) सुदुरपश्चिम प्रदेश कार्यालयसे कञ्चनपुर जिल्लामे संचालन करे लागल स्थानीय समुदायहे सचेत परटी जिम्मेवार निकायहे जवाफदेही बनैना कार्यक्रम अन्तरगत सोम्मार लक्ष्मी माविमे आयोजित परियोजना परिचय तथा बालअधिकार चेतना समुह गठन हुइल हो ।

कार्यक्रममे परियोजनाके कञ्चनपुर जिल्ला सहजकर्ता कैलाश पनेरु परियोजना अन्तरगत बिद्यालयमे संचालन कना कार्यक्रमबारे जानकारी करैले रहिट । चालु आर्थिक बर्षमे कञ्चनपुर जिल्लाके कार्यक्रम सञ्चालित विद्यालयमे वालअधिकार शिविर, वालअधिकार चेतना समुहके प्रदेश तथा संघ स्तररीय संञ्जाल, फोरम थिएटर कार्यशाला, जातीय विभेद, लैङ्गिक विभेद, बह्रटी जैटी रहल वातावरण प्रद्षण विरुद्ध सडक नाटक प्रदर्शन लगाएतके कार्यक्रम आयोजना कैना बा ।

कक्षा नौ के छात्रा भावना रानाके अध्यक्षतामे १३ सदस्यीय वालअधिकार चेतना समुहके गठन करल लक्ष्मी मा.वि.के संरक्षक शिक्षक बुद्धि प्रसाद शर्मा जानकारी डेलै ।
ओस्टेक करके यिहे भदौ २६ गतेके दिन बेलौरी नगरपालिका–३ खिरिया स्थित श्री जनजागृति पुष्पलाल स्मृति मा.वि.मे कक्षा नौ के छात्रा एलिजा चौधरीके अध्यक्षतामे १३ सदस्यीय वालअधिकार चेतना समुहके गठन करल जनजागृति पुष्पलाल स्मृति मा.वि.के संरक्षक शिक्षक खडक कुमारी रेग्मी जानकारी डेली ।
ओस्टेक करके इन्सेकसे कार्यक्रम संचालन करल कञचनपुर जिल्लाके लालझाडी गाउँपालिका वार्ड नं. १ नौरंगास्थित श्री शारदा मा.वि.मे यिहे भदौ २१ गतेके दिन कक्षा नौ के छात्रा आरती सेटीके अध्यक्षतामे १३ सदस्यीय ओ भदौ २३ गतेके दिन लालझाडी गाउँपालिकाकेृ वार्ड नं. २ कञ्जस्थित भानु मा.वि.मे कक्षा नौ के छात्र राघबदेव तिरुवाके अध्यक्षतामे १५ सदस्यीय बालअधिकार चेतना समुहके गठन करल अनौपचारिक क्षेत्र सेवा केन्द्र (इन्सेक)के कञ्चनपुर जिल्ला सहजकर्ता पनेरु जानकारी डेलै ।