प्राकृतिक स्रोत द्वन्द्व रुपान्तरण केन्द्रसे ६ ठो विवाद समाधान
पहुरा समाचारदाता
धनगढी, ३० भदौ । प्राकृतिक स्रोत द्वन्द्व रुपान्तरण केन्द्र नेपालसे दुई बर्षमे करल कार्य सार्वजनिक करटी ६ विवादके दिगो समाधन हुइल जनैले बा ।
बिफेक रोज धनगढीमे सरोकारवाला निकायहुकनसंग हुइल बैठकमे कैलालीमे रहल बहु सरोकारवालासंगके ६ विवादके दिगो समाधन कैगिल प्राकृतिक स्रोत द्वन्द्व रुपान्तरण केन्द्र नेपालके क्षेत्रीय संयोजक बल्लु चौधरी बटैलै ।
उहाँक अनुसार कैलालीके शिवकालिका सामुदायिक वन ओ बडीमालिका सामुदायिक वनके सिमाना विवाद, लम्की चुहा नगरपालिका वडा नम्बर ९ वनवर्षाके खेल मैदान उपभोग सम्बन्धित विवाद, टीकापुर नगरपालिका वडा नम्बर ७ बेलुवा पनफेकुवा झरणके पानी निकास सम्बन्धी विवाद सल्टाइल बा ।
ओस्टेक करके, टीकापुर नगरपालिका वडा नम्बर ९ बौनियासे पयलगाउँ जैना डगर निकासी सम्बन्धी विवाद, घोडाघोडी नगरपालिका वडा नम्बर ३ दौनावेवारी युवा क्लवके डगर निकासी तथा खनजोत, सम्बन्धी विवाद ओ भजनी नगरपालिका वडा नम्बर ५ पिपराहुवा सामुदायिक वनके सिमाना एकिन सम्बन्धि विवादमे हाल प्रक्रियामे रहल संयोजक बटैलै ।
संयोजक बल्लु चौधरीके अनुसार विवाद समाधान करसेकलपाछे फेरसे सुल्झैना समस्या हुइना करल बा । ‘ढेर दिन लगाके विवाद समाधान करल रहठ, उहाँ कहलै । ‘कुछ महिनामे फेर विवाद हुइल खवर आई सेकठ । यिहीहे रोक्न चुनौती बा ।’
उहाँ यम्ने स्थानीय सरकारसेफे चासोके साथ निगरानी कैना आवश्यक रहल बटैलै ।
कार्यक्रमके धनगढी उपमहानगरपालिका उपमेयर कन्दकला राना समाजमे टमान मेरिक द्वन्द्व हुइल बटैटी उ बाट न्यायिक समिति समफे पुग्न करल बटैली । उहाँ कानुन अनुसार काम करलेसेफे कहुफे विवाद नइअइना उल्लेख करली । क्षेत्राधिकारसे बाहेर जाके काम करे खोज्लेसे विवाद हुइना करल उहाँ बटैली । अपनेफे न्यायिक समिति मार्फत ढेर मुद्दा मिलमिलाप करैना करल उहाँ प्रष्ट परली ।
कार्यक्रममे जिल्ला समन्वय समितिके उप–संयोजक खगराज भुषाल तरेक तहमे समाजमे हुइना टमान विवाद समाधान हुइलेसे यी मेरिक कार्यसे अदालतसम चाप कम हुइना बटैलै । कैलारी गाउँपालिकाके उपाध्यक्ष भगवतीकुमारी चौधरी वडा–३ ओम नगरमुक्त कमैया बस्तीमे विवाद समाधान कैना ओरसे सरकारी ओ गैरसरकारी पक्षहे ध्यान डैडेना आग्रह करली ।
कार्यक्रमके संचालन प्राकृतिक स्रोत द्वन्द्व रुपान्तरण केन्द्र नेपालके कैलालीके सहजकर्ता बन्धुप्रसाद चौधरी ओ स्वागत मन्तव्य रिता चौधरी करले रहिट ।
कार्यक्रममे लम्की–चुहा नगरपालिका, घोडाघोडी नगरपालिका, गोदावरी नगरपालिका ओ धनगढी उपमहानगरपालिका प्रमुख एवं प्रतिनिधि, टमान कार्यालयके प्रमुखहुकनके सहभागिता रहे ।
