बाढसे कैलालीके टमान ठाउँ डुबान
पहुरा समाचारदाता
धनगढी, १ कुँवार । अविरल बर्षाके कारण आइल बाढसे कैलालीके टमान ठाउँ डुबानमे परल बा । बाढसे कैलालीमे करिब १ हजारसे ढिउर घर डुबानमे परल हो । कैलालीके भजनी नगरपालिका, जोशीपुर ओ कैलारी गाउँपालिकाके करिब हजारसे ढिउर घर डुबानमे परल जनाइल बा ।
जिल्ला प्रशासन कार्यालय कैलालीके सूचना अधिकारी शिवराज जोशी मोहना, पथरैया, काढा ओ कान्द्रा, कटैनी लडियामे आइल बाढ बस्तीमे पैँठके घर डुबानमे परल बटैलै । लडियाके जलस्तर बह्रना क्रम रहल ओरसे लडिया तटीय क्षेत्रके बासिन्दाहे सुरक्षित स्थान ओर जैना आग्रह करल सूचना अधिकारी जोशी बटैलै ।
भजनीमे ढिउर क्षति
बाढसे सबसे ढिउर भजनी नगरपालिकामे क्षति पुगाइल जनाइल बा ।
ईलाका प्रहरी कार्यालय भजनीके अनुसार वडा नं. १ भजनी बजार स्थित २०/२५ ठो पसलमे पानी पैँठल जनाइल बा । ओस्टके वडा नम्बर ३ के पडरिया स्थित २०/२५ घर ओ ५र७ ठो पसलमे पानी पैँठल जनाइल बा ।
इलाका प्रहरी कार्यालय भजनीसे प्रनि धर्मेन्द्र खड्काके नेतृत्वमे गैल प्रहरी टोली बाढ प्रभावितहे सुरक्षित ठाउँमे राखल बा । ओस्टके भजनी नगरपालिकाके जेसिवीसे जम्र्याइल पानीहे निकास करल जनाइल बा ।
ओस्टके रातके हावापानीसे भजनी नगरपालिका १ मुक्त कमैयाँ सिबिरके हरी बुढाके कच्ची घरके पालीमे ढलके क्षति पुगाइल जनाइल बा । ओस्टके लग्गेहे रहल टीकाराम चौधरीके कच्ची भान्सामे उ रुखवाके डहिका गिरके भान्सा समेत भत्कल जनाइल बा ।
भजनी नगरपालिका २ मोहनपुरके गंगा चौधरीके पोखरीम रहल मच्छी सक्कु पुहाके लैगिल उहाँ जानकारी डेलै ।
ओस्टके पठ्रहिया लडियाके बाढसे भजनी नपा ८ के सोनाफाँटा टोल, दैलेखी टोल, भरतान टोल, जनकपुर टोल ओ छछरहवा टोलके १५०।१६० घरधुरीमे पानी पैँठल जनायल बा । कान्द्रा लडियाके बाढसे वडा नम्बर ५ के २००।२५० घर धुरीमे पानी पैँठल जनाइल बा । कान्द्रा लडियाके बाढसे वडा नम्बर ५ के कुटी गाँउ, वडा नम्बर ७ के शिबिर टोल, गणेशमान टोल ओ दक्षिणपुर्वा टोलके अन्दाजी २००।२५० घरधुरीमे पानी पैँठल जनाइल बा । मने चौपाया ओ पशुचौपायाके क्षति भर नैहुइल जनाइल बा ।
कैलारीके दर्जन ढिउर गाउँ डुबान
बाढसे कैलारी गाउँपालिकाके दर्जनसे ढिउर गाउँ डुबान परल जनाइल बा । गाउँपालिकाके वडा नम्बर ५ अन्र्तगत मनकापुर, बन्दरगौरी, बैजपुर, सपना शिविर सहित वडा नम्बर ७ के बर्का बसन्ता, छटकपुर बसन्ता, रामपुर, नारायणपुर लगायतके गाउँ डुबानमे परल गाउँपालिका अध्यक्ष राजसमझ चौधरी जानकारी डेलै । कटैनी लडियामे आइल बाढसे डुबान हुइल उहाँ बटैलै ।
अध्यक्ष चौधरी जनप्रतिनीधी, सशस्त्र, जनपद प्रहरी, स्थानीय लगायतसे डुबानमे परलहुक्रनके उद्धार कैटी रहल बटैलै । कैलारी गाउँपालिका वडा नं. ७ रामपुर, भुँइयाँफाँटा, बर्का बसन्ता ओ छटकपुर बसन्ता, कमैया शिविरमे लगायतके गाउँमे बाढ पैँठल जनाइल बा ।
बाढसे कैलारी गाँउपालिका वडा नं.८ खल्ला टोल, खैरी टोल, कुटी टोल, वडा नम्बर ५ के बन्दरगौह्रीके ११०।११५ घरधुरीमे डुबान परल इलाका प्रहरी कार्यालय हसुलियाके प्रसनि देब बहादुर चन्द जानकारी डेलै ।
ओस्टके मोहना लडियाके बाढसे वडा नम्बर ३ खोनपुर स्थित मोहना लडियामे निर्माणाधिन अवस्थामे रहल झुलुङगे पुलके पिल्लर फेन पुहाके लैगिल जनाइल बा ।
पठ्रैया ओ घैला खोलुवाके बाढसे जोशीपुर गाउँपालिकाके टमान ठाउँमे डुबान हुइल बा । बाढसे वडा नम्बर ४ के केरा बारीमे पैँठके ७/८ घर डुवान हुइल जनाइल बा ।
ओस्टके वडा नम्बर ३ स्थित पर्ना काँढा लडियाके बाढसे भिटरिया, फाडिया, मनिकापुर, हस्नापुर, बन्जरिया, भगरैया लगायत गाँउके २५०।३०० घरधुरी डुवान परल जनाइल बा । ओ वडा नम्बर ४ स्थित पठरहिया लडियाके बाढसे खैरेनी टोलके ८०।९० घरधुरी डुबान परल जनाइल बा ।
टीकापुर ओ जानकी फेन डुबानमे
उहोर बाढसे टीकापुर नगरपालिका ओ जानकी गाउँपालिकाके टमान क्षेत्र डुबानमे परल जनाइल बा । बाढसे जानकी गाउँपालिका वडा नम्बर ४ के मुनुवा, बेलपुर, गिरधरपुरके ६४ घर ओ वडा नं. ७ फरेलामे १६ घर सहित ८० घर आंशिक डुवानमे परल जनाइल बा ।
बाढसे प्रभावित ६०/७० जाने सामुदायिक उच्च भवनमे बैठल अस्थायी प्रहरी पोष्ट तोरैँयापुरके प्रसनि सुरत बहादुर बोहरा जानकारी डेलै ।
पठरैया लडियाके बाढसे लम्कीचुहा नगरपालिका वडा नम्बर ९ बनबर्षा, सोहनपुर ओ धनजयाके १०।१२ घर डुबान हुइल प्रहरी चौकी प्रतापपुरके प्रसनि लाल बहादुर ठकुल्ला जानकारी डेलै । ओस्टके बाढ पैँठके वठा नम्बर ९ बनबर्षाके दिपेश थारुके २५० ब्रोइलर मुर्गी मरल, वीरबहादुर थारुके एकठो सुरा मरल जनाइल बा ।
ओस्टके वडा नम्बर ७ खरौला ओ बाहुनपुरके ९०।९५ घरधुरीमे बाढ पेलल् जनाइल बा ।
