उद्धार ओ राहतमे खट्ना मन्त्री रावलके निर्देशन
पहुरा समाचारदाता
धनगढी, १ कुँवार । सदूरपश्चिम प्रदेश सरकारके आन्तरिक मामिला तथा कानुनमन्त्री डा. रणबहादुर रावल बाढीपहिरो प्रभावित जिल्लाके सुरक्षा प्रमुखहे तत्काल उद्धारमे खट्ना निर्देशन डेले बाटै ।
शनिच्चरके अछाम, कैलाली ओ कञ्चनपुरमे बाढीपहिरोसे क्षति हुइलहुक्रनके उद्धारमे खट्ना प्रमुख जिल्ला अधिकारी ओ जिल्ला प्रहरी प्रमुखहे फोन कैके निर्देशन डेहल बटैलै ।
उहाँ अछामके प्रमुख जिल्ला अधिकारी विश्वराज मरासिनी ओ अछामके प्रमुख प्रहरी नायब उपरीक्षक नारायण डाँगीहे टेलिफोन कैके टमान ठाउँमे रातके गैल पहिरोमे परके ज्यान गुमाइल, बेपत्ता तथा घाइतेके उद्धार तथा उपचारमे कौनो कसर बाँकी नैरख्ना निर्देशन डेहल हुइट ।
ओस्टके, कैलाली ओ कञ्चनपुरके सुरक्षा संयन्त्रहे टेलिफोन सम्पर्क कैके उद्धार कार्यमे खट्ना निर्देशन डेहल मन्त्री रावल जानकारी डेलै ।
“मै आपन मातहतके सक्कु निकायहे मुभ करासेकल बाटुँ,” मन्त्री रावल कहलै, “घटनके बारेम फेन अपनहे प्रत्यक्ष फोन कैके बुझ्टी बाटुँ ।”
शुकके रात अछामके ढकारी गाउँपालिका, कमलबजार नगरपालिका ओ तुर्माखाँद गाउँपालिकामे पहिरोमे भँठके २२ जनहनके मृत्यु हुइल बा । अब्बे फेन वर्षा निरन्तर हुइटी रहल ओरसे उद्धारमे कठिनाइ हुइल प्रहरी जनैले बा । कैलाली ओ कञ्चनपुरके टमान भाग डुबान हुइल बा ।
