बाढसे कैलालीमे हजारौ घरधुरी प्रभावित

एकके मृत्यु एक जाने वेपत्ता

पहुरा समाचारदाता
धनगढी, १ कुँवार । अविरल बर्षाके कारण आइल बाढसे कैलालीके हजारौं घरधुरी प्रभावित हुइल बा, कलेसे सयौं परिवार विस्थापित हुइल बटै ।

कैलालीके कैलारी गाउँपालिका, भजनी नगरपालिका, जोशीपुर गाउँपालिका लम्की चुहा नगरपालिका, टीकापुर नगरपालिका ओ धनगढी उपमहानगरपालिकाके हजारौं घर डुबानमे परल जिल्ला प्रशासन कार्यालय कैलाली जनैले बा ।

कैलालीके कैलारी गाउँपालिकामे टमान वडामे करिब ९ सय घरधुरी डुबानमे परके प्रभावित हुइल बटै । गाउँपालिकाके वडा नम्बर ५ अन्र्तगत मनकापुर, बन्दरगौरी, बैजपुर, सपना शिविर सहित वडा नम्बर ७ के बर्का बसन्ता, छटकपुर बसन्ता, रामपुर, नारायणपुर, टिघरी लगायतके गाउँ डुबानमे परल गाउँपालिका अध्यक्ष राजसमझ चौधरी जानकारी डेलै । कटैनी लडियामे आइल बाढसे डुबान हुइल उहाँ बटैलै ।

कैलारीके वडा–५ मे ३ सय घरधुरी, वडा–८ मे २५०, वडा नम्बर १ मे ४०, वडा नम्बर ७ मे ३१० घरधुरी डुबानमे जनागिल बा । ओस्टेक करके गाउँपालिका अध्यक्ष राजसमझ चौधरी,उपाध्यक्ष भगवतीकुमारी चौधरी, जनप्रतिनीधी, सशस्त्र, जनपद प्रहरी, स्थानीय लगायतसे डुबानमे परलहुक्रनके उद्धारमे खटल रहिट । कैलारी गाउँपालिका वडा नं. ७ रामपुर, भुँइयाँफाँटा, बर्का बसन्ता ओ छटकपुर बसन्ता, कमैया शिविरमे लगायतके गाउँमे बाढ पैँठल जनाइल बा ।

ओस्टके मोहना लडियाके बाढसे वडा नम्बर ३ खोनपुर स्थित मोहना लडियामे निर्माणाधिन अवस्थामे रहल झुलुङगे पुलके पिल्लर फेन पुहाके लैगिल इलाका प्रहरी कार्यालय हसुलियाके प्रमुख रामसिंह बोहरा बटैलै । ओस्टेक करके कैलारी गाउँपालिकाके आर्थिक सहयोगमे बाढ पीडितहुकनके राहात वितरण कैगिल बा । कलेसे नेपाल रेडक्रस सोसाइटी कैलाली पीडित परिवारहे त्रिपाल वितरण कैना जनैले बा । यिहे प्रमुख प्रमुख जिल्ला अधिकारी किरण थापाके नेतृत्वमे गैल टोली कैलारीके बाढ प्रभावित क्षेत्रके अनुगमन करले बटै ।

जिल्ला प्रशासन कार्यालय कैलालीके सूचना अधिकारी शिवराज जोशी मोहना, पथरैया, काढा ओ कान्द्रा, कटैनी लडियामे आइल बाढ बस्तीमे पैँठके घर डुबानमे परल बटैलै । भजनीमे बाढसे सबसे ढिउर क्षति पुगाइल जनाइल बा । ईलाका प्रहरी कार्यालय भजनीके अनुसार वडा नं. १ भजनी बजार स्थित २०÷२५ ठो पसलमे पानी पैँठल जनाइल बा । ओस्टके वडा नम्बर ३ के पडरिया स्थित २०÷२५ घर ओ ५÷७ ठो पसलमे पानी पैँठल जनाइल बा । इलाका प्रहरी कार्यालय भजनीसे प्रनि धर्मेन्द्र खड्काके नेतृत्वमे गैल प्रहरी टोली बाढ प्रभावितहे सुरक्षित ठाउँमे राखल बा ।

ओस्टके भजनी नगरपालिकाके जेसिवीसे जम्र्याइल पानीहे निकास करल जनाइल बा । ओस्टके रातके हावापानीसे भजनी नगरपालिका १ मुक्त कमैया शिविरके हरी बुढाके कच्ची घरके पालीमे ढलके क्षति पुगाइल जनाइल बा । ओस्टके लग्गेहे रहल टीकाराम चौधरीके कच्ची भान्सामे उ रुखवाके डहिका गिरके भान्सा समेत भत्कल जनाइल बा ।

भजनी नगरपालिका २ मोहनपुरके गंगा चौधरीके पोखरीम रहल मच्छी सक्कु पुहाके लैगिल उहाँ जानकारी डेलै । ओस्टके पठ्रहिया लडियाके बाढसे भजनी नपा ८ के सोनाफाँटा टोल, दैलेखी टोल, भरतान टोल, जनकपुर टोल ओ छछरहवा टोलके १५०÷१६० घरधुरीमे पानी पैँठल जनायल बा । कान्द्रा लडियाके बाढसे वडा नम्बर ५ के २००÷२५० घर धुरीमे पानी पैँठल जनाइल बा । कान्द्रा लडियाके बाढसे वडा नम्बर ५ के कुटी गाँउ, वडा नम्बर ७ के शिबिर टोल, गणेशमान टोल ओ दक्षिणपुर्वा टोलके अन्दाजी २००÷२५० घरधुरीमे पानी पैँठल जनाइल बा । मने चौपाया ओ पशुचौपायाके क्षति भर नैहुइल जनाइल बा । भजनीमे १ हजार ५० घरधुरीमे पानी पैठके ८ सय व्यक्ति विस्थापित हुइल बटै । यहाँ एक जाने वेपत्ता हुइल बटै । वेपत्ता हुइलमे वडा–८ के ५५ बरसके कालु चौधरी वेपत्ता हुइल बटै ।

पठ्रैया ओ घैला खोलुवाके बाढसे जोशीपुर गाउँपालिकाके टमान ठाउँमे डुबान हुइल बा । बाढसे वडा नम्बर ४ के केरा बारीमे पैँठके ७÷८ घर डुवान हुइल जनाइल बा । ओस्टके वडा नम्बर ३ स्थित पर्ना काँढा लडियाके बाढसे भिटरिया, फाडिया, मनिकापुर, हस्नापुर, बन्जरिया, भगरैया लगायत गाँउके २५०।३०० घरधुरी डुवान परल जनाइल बा । ओ वडा नम्बर ४ स्थित पठरहिया लडियाके बाढसे खैरेनी टोलके ८०।९० घरधुरी डुबान परल जनाइल बा ।

टीकापुर ओ जानकी फेन डुबानमे उहोर बाढसे टीकापुर नगरपालिका ओ जानकी गाउँपालिकाके टमान क्षेत्र डुबानमे परल जनाइल बा । जिल्ला प्रशासन कार्यालयसे डेहल जानकारी अनुसार टीकापुरमे १७५ घरधुरी डुबानमे परल बा कलेसे ७० विस्थापित हुइल जनागिल बा । ओस्टेक टीकापुर–१ मे रुखुवा गिरके एक ठो छेगरीया मुवल बा । टीकापुरमे घर भस्कके २२ बरसके शिशिर चौधरी घाहिल हुइल बा । बाढसे जानकी गाउँपालिका वडा नम्बर ४ के मुनुवा, बेलपुर, गिरधरपुरके ६४ घर ओ वडा नं. ७ फरेलामे १६ घर सहित ८० घर आंशिक डुवानमे परल जनाइल बा । बाढसे प्रभावित ६०÷७० जाने सामुदायिक उच्च भवनमे बैठल अस्थायी प्रहरी पोष्ट तोरैँयापुरके प्रसनि सुरत बहादुर बोहरा जानकारी डेलै । पठरैया लडियाके बाढसे लम्कीचुहा नगरपालिका वडा नम्बर ९ बनबर्षा, सोहनपुर ओ धनजयाके १०।१२ घर डुबान हुइल प्रहरी चौकी प्रतापपुरके प्रसनि लाल बहादुर ठकुल्ला जानकारी डेलै । ओस्टके बाढ पैँठके वडा नम्बर ९ बनबर्षाके दिपेश थारुके २५० ब्रोइलर मुर्गी मरल, वीरबहादुर थारुके एकठो सुरा मरल जनाइल बा । ओस्टके वडा नम्बर ७ खरौला ओ बाहुनपुरके ९०।९५ घरधुरीमे बाढ पेलल् जनाइल बा । धनगढी उपमहानगरपालिकामे १५ घरघुरी डुबानमे परल बा । यहाँ वडा–१३ के २० बरसके नविना चौधरीके बाढमे डुबके मृत्यु हुइल बा ।