किसान–२ नेपालके समन्वय बैठक

पहुरा समाचारदाता
हसुलिया, १ कुवाँर । ज्ञानमा आधारित एकिकृत दिगो कृषि परियोजना (किसान–२) नेपालके समन्वय बैठक शुकके रोज हसुलियामे हुइल बा ।

युएसएडके आर्थिक सहयोगमे किसान–२ नेपाल कैलारीमे सन २०१७ से २२ सम परियोजना लागु करल मने कोभिडके कारण काम करे नइपाइल कहटी यकर अवधि दुई बर्ष ठपल क्षेत्रीय संयोजक सुचिता उप्रेती बटैली । किसान–२ नेपाल यहाँ मकै ओ मसिना धानवलीके क्षेत्रमे काम करटी आइल उहाँ बटैली । यी परियोजना सुदूरपश्चिम प्रदेशके कैलाली ओ कञ्चनपुरमे, कर्णालीके सुर्खेतमे, लुम्बिनीके कपिलबस्तु, पाल्पा, दाङ, बाँके बर्दिया जिल्लामे लागु हुइल क्षेत्रीय संयोजक उप्रेती बटैली । कैलालीके धनगढी, कैलारी, जोशीपुर ओ भजनी नगरपालिकाके काम करटी रहल उहाँ बटैली ।

कार्यक्रममे कैलारी गाउँपालिकाके अध्यक्ष राजसमझ चौधरी यहाँ मकै बाली मजा हुइना मने मसिना धानवालीके लाग चुनौती रहल बटैलै । मसिना धान ठोरिक ढिला हुइना ओरसे सिचाईके समस्या रहल बटैलै ।

किसान–२ नेपालके परियोजना अधिकृत अर्जुन चौधरी यी परियोजनामे सिचाईके लाग कार्यक्रम अइना रहल ओरसे पालिकासे समन्वय कैना बटैलै । किसान–२ नेपालके परियोजना कैलारीमे बनदेवी कृषि सहकारी ओ पावित्रा एग्रोभेटके सहकार्यमे काम करटी आइल रहे । कलेसे आब भर किसान–२ नेपाल परियोजना कैलारी गाउँपालिकामे दुई बरस ठाकुर एग्रोभेट धनगढीसे सहकार्य करके काम जनैले बा ।

समन्वय बैठकमे गाउँपालिकाके उपाध्यक्ष भगवतीकुमारी चौधरी, प्रमुख प्रशासकीय अधिकृत विरबहादुर ऐर, योजना शाखा प्रमुख सन्तोषकुमार चौधरी, वडा नम्बर ७ के अध्यक्ष दिपेन्द्रबहादुर बम, कृषि शाखाके प्रमुख मैयाकुमारी चौधरीलगायतके सहभागिता रहे ।