बाढ पीडितहुकनके पुनःस्थापना ओ राहत सहयोगके लाग कैलारीसे अपिल

पहुरा समाचारदाता
हसुलिया, २ कुवाँर । यिहेक कुवाँर १ गते आइल बाढ पीडितके पुनस्र्थापना ओ राहत सहयोगके लाग कैलारी गाउँपालिकासे अपिल करले बा ।

विफेक रातसे सुरु बर्षासे शनिच्चर रोज टमान वडाके हजारसे ढेर घरधुरी डुबानमे परलके लत्ता कपडा ओ खाद्यन्न नष्ट हुइल कैलारी गाउँपालिकाके अध्यक्ष राजसमझ चौधरी बटैलै । उहाँ कहलै, शनिच्चरके कटैनी, मोहना ओ घुरहा लडियामे आइल बाढसे टमान वडाके हजारौके घर डुबानमे परल । उहाँहुक्रे बरस भरिक लाग धारल अन्नवाली भिजके नष्ट हुइल बा ।’
कैलारीके अधिकाँस भाग डुबान, पटान ओ कटान करके धानवालीके साथे व्यापक मात्रमे धनमालके नोक्सानी हुइल ओरसे असिन विपदके बेला बाढ पीडितहुकनके पुनस्र्थापना ओ राहत सहयोगके लाग अपिल अध्यक्ष राजसमझ चौधरी बटैलै ।
अँटवारके रोज गाउँपालिकासे अपिलपत्र जारी करटी बाढ पीडितहुकनके पुनस्र्थापना आवश्यक राहत सहयोग तथा समन्वयके लाग सरकारी निकाय, वित्तीय संस्था, गैरसरकारी संघ÷संस्था नागरिक समाज, उद्योगी व्यापारी तथा आमनागरिकहुकनसे आग्रह करल बा ।

कैलारी गाउँपालिकामे टमान वडामे एक हजारसे ढेर घरधुरी डुबानमे परके प्रभावित हुइल बटै । गाउँपालिकाके वडा नम्बर ५ अन्र्तगत मनकापुर, बन्दरगौरी, बैजपुर, सपना शिविर सहित वडा नम्बर ७ के बर्का बसन्ता, छटकपुर बसन्ता, रामपुर, नारायणपुर, टिघरी लगायतके गाउँ डुबानमे परल रहे । कैलारीके वडा–५ मे ३ सय घरधुरी, वडा–८ मे २५०, वडा नम्बर १ मे ४०, वडा नम्बर ७ मे ३१० घरधुरी डुबानमे जनागिल बा ।
ओस्टके मोहना लडियाके बाढसे वडा नम्बर ३ खोनपुर स्थित मोहना लडियामे निर्माणाधिन अवस्थामे रहल झुलुङगे पुलके पिल्लर फेन पुहाके लैगिल बा ।