परिवार नियोजनके साधन प्रयोग कैना जोड
पहुरा समाचारदाता
धनगढी, २ कुँवार । स्वास्थ्य कार्यालय कैलालीके आयोजनामे अँट्वारके धनगढीमे नवौं राष्ट्रिय परिवार योजना दिवस २०७९ बारे अन्तरक्रियात्मक कार्यक्रम हुइल बा ।
‘व्यवस्थित परिवार हमार अधिकार, हम्रे सक्कुजे जिम्मेवार’ कना नारा सहित हुइल कार्यक्रममे सहभागिहुक्रे परिवार नियोजनके साधन प्रयोगबारे जनचेतना, सहज उपलब्धता बारे सक्कु जाने लागे पर्ना बटाइल रहिट ।
स्वास्थ्य कार्यालय कैलालीके प्रमुख लालबहादुर धामी परिवार नियोजन साधनके प्रयोग बारे जनचेतना, परिवार नियोजनके साधन प्रयोगसे हुइना फाइदाबारे संघ, प्रदेश ओ स्थानीय सरकारसे लेके सरकारी गैर सरकारी संघसंस्था ओ समुदाय ओ परिवारके महत्वपूर्ण भूमिका रहना बटाइल रहिट ।
परिवार नियोजनके अस्थायी आधुनिक पाँच प्रकारके साधन (ढाल, पिल्स, डिपो, इन्प्लान्ट ओ आइयुसीडी)के प्रयोगदर फेन कम रहल जनाइल बा । परिवार नियोजके साधन प्रयोग करे पर्ना ज्ञान रलेसे फेन कम जाने किल प्रयोग कैना हुइल ओरसे परिवार नियोजनके साधन बारे जानकारी कराइ पर्ना जोड डेहल रहे ।
कार्यक्रममे स्वास्थ्यकर्मी, अस्तापल संचालक, पत्रकार, टमान संघसंस्थाके पदाधिकारीहुक्रनके सहभागिता रहल रहे ।
