बाढसे कैलालीमे छ हजार परिवार विस्थापित

पहुरा समाचारदाता
धनगढी, २ कुँवार । शनिच्चरके आइल बाढीके कारण कैलालीके करिब छ हजार परिवार विस्थापित हुइल बाटै ।

जेम्ने भजनी नगरपालिकाके सबसे ढिउर बाढसे प्रभावित हुइल बाटै । जम्मा ५८ हजार जनसंख्या रहल भजनी नगरपालिकामे ३५/४० हजार घरपरिवार प्रभावित हुइल बाटै । पाँच हजारसे ढिउर परिवार विस्थापित होके सडकमे आइल ओ ढिउर जनहनके आभिन उद्धार नैहुइ सेकल भजनी नगरपालिकाके प्रवक्ता एवम् वडा नम्बर ३ के वडा अध्यक्ष विक्रम चौधरी जानकारी डेलै ।

‘आभिन फेन ढिउर मनै घरक छाप्रा, पाँरा ठाँठीमे बैठल बाटै । लाउ बिना ओइनके घरसम पुगे सेक्ना स्थिति नैहो । उहाँहुक्रनके उद्धार हुइल नैहो’, उहाँ कहलै ,‘प्रदेश सरकार ओ जिल्ला प्रशासन कार्यालयहे हम्रे हेलिकोप्टरमार्फत उद्धारके लाग कहली । मने, सुनुवाइ नैहुइल ।’

उद्धारके पर्खाइमे रहल उहाँ जानकारी डेलै । उहाँ सक्कु उद्धार कार्यके लाग खटल ओरसे अब्बेसम किहुहे राहत फेन वितरण नैकरल उल्लेख करलै । ‘मनैनके उद्धार नैहुइल हो’, उहाँ कहलै,‘हम्रे उद्धारहे प्राथमिकता डेले बाटी । राहत पाछेक बात हो ।’
मने, जिल्ला प्रशासन कार्यालय भर बाढमे फसल ओइनके लगभग सबके उद्धार हुइल जनैले बा ।‘सम्पर्क हुइ नैसेकल वा सम्पर्कमे आइ नैसेकलहुक्रनके उद्धार हुइ छुुटल हो’, जिल्ला प्रशासन कार्यालयके सूचना अधिकारी शिवराज जोशी कहलै,‘मने, सम्पर्कमे आइल लगभग सबके उद्धार होसेकल बा ।’

नैरहल ठेङ्गरपुर गाउँ

भजनी नगरपालिका–१ मे रहल ठेङ्गरपुर गाउँ भग्नावशेषमे परिणत हुइल बा । सय घरधुरी रहल उ गाउँहे कान्द्रा लडियाके बाढ भग्नावशेषमे परिणत करल नगरपालिकाके प्रवक्ता चौधरी बटैलै ।‘४०/४५ घरके टे कुछ फेन बाँकी नैहो’, उहाँ कहलै,‘सक्कु बाढ पुहा लैगिल ।’

शनिच्चरके मोहना, कान्द्रा, कर्णाली, पथरैया, कटैनी लगायत नदीनालामे आइल बाढसे कैलालीमे वितण्डा मचाइल हो । बाढके कारण धनगढी उपमहानगरपालिका–१३ के २० वर्षीया नवीना चौधरी ओ भजनी नगरपालिका–८ गोरचौराके ५५ वर्षीय कालुराम चौधरीके ज्यान गैल बा ।