कानून निर्माणसे ढेर ध्यान आर्थिक क्रियाकलापमे

पहुरा समाचारदाता
धनगढी,२ कुवाँर । कानून निर्माणमे संघीय संसदके योगदानः चुनौती विषयक अन्तरक्रिया कार्यक्रम अँटवारके रोज धनगढीमे सम्पन्न हुइल बा ।

राष्ट्रिय सभा सदस्य नन्दा चपाईके अध्यक्षतामे हुइल कार्यक्रममे बरिष्ठ अधिवक्ता खिमलाल देवकोटा कानून निर्माणमे संघीय संसदके योगदानः चुनौती विषयक कार्यपत्र प्रस्तुत करल रहिट ।
कार्यक्रममे सविधान सभा सदस्य हरि श्रीपाइली कबु–कबु लोगो नुकैना अवस्था आइल बटैलै । बनाइल कानून जनतामाझ जाई नइसेकल बल्की योजनामे कमिशनके लाग आ अपन मनैन खोजके उपभोक्ता समिति बनैना, अपनही डोजर खोजके लागल आरोप लगैलै । प्रदेश सरकारसे बनाइल ऐन कानुन ८५ पालिकामे नइपुगल बटैलै ।

बार ईकाई कैलालीके अध्यक्ष सिद्धराज ओझा जनताके हितमे नलाग्ने सांसदहुकनके कार्वाही कैना जरुरी रहल बटैलै । पार्टीके हिवपके कारण जनताके लाग अइना कानून आइनइसेकल उहाँ बटैलै । जनताके सरोकार रख्ना ऐन बनाईबेर सरोकारवालासे छलफल नइकरके शहर केन्द्रीत छलफल हुइना करल उहाँ बटैलै । धनगढी उपमहानगरपालिका–२ वडा अध्यक्ष धर्मराज ओझा बनाइल स्थानीय स्तरमे छलफल करके जाई पर्ना सुझाव डेलै ।
जनता समाज पार्टीके जिल्ला अध्यक्ष गया प्रसाद कुश्मी संसदके पहिले काम कैना योजना नइरहल बटैलै । नेपालमे बैठना जीवनभर बैठटी आइल नागरिक नागरिकतासे बञ्चित हुइल बटैलै । उहाँ कहलै, विदेशीहे नागरिकता नइडेहे परल । मने जे पाई पर्ना हो उहीहे नागरिकतासे बञ्चित करे नइहइना उहाँ बटैलै । हिवपके कारण जनताके पक्षमे अइना कानून आई नइसेकल बटैलै । सुदूरपश्चिम प्रदेशमे जनताके पक्षमे आइल कानूनफे अपरिपक्वता रहल उहाँ बटैलै ।
एनएनडिएसडब्लुओ के अध्यक्ष चक्र विक सासदके भुमिका विकास कैना ओ निर्माण कैना हो । जनताके आपेक्षफे कटरा विकास कैना, बजेटफे दुरुपयोगफे कैना करल बटैलै । संघके निर्चाचन प्रणाली सामन अनुपातमे हुइलेसे भ्रष्टचार कम हुइना बटैलै ।

इन्सेक प्रदेश कार्यालयके प्रलेख अधिकृत कृष्ण विक संसद गम्भीर नइबनल कारण नागरिक सरोकारसंगके कानून बनल बटैलै । संसदसे नागरिकसे जोर कानूनमे ध्यान डेहे पर्ना बटैलै । दलहुक्रे शक्ति ओ पँहुचके भरमे काम करटी रहल उहाँ बटैलै ।
जिसस उपसभापति खगराज भुषाल संसदके आर्थिक क्रियाकलापामे ढेर ध्यान डेहल बटैलै । निर्वाचन प्रणालीके परिवर्तन कैना जरुरी रहल बटैलै । जिल्ला प्रहरी कार्यालय कैलालीके प्रहरी निरिक्षक सरस्वती अधिकारी समाजमे असर पर्ना कानून संशोधन करलेसे अपनेहुकनके काम कैना सहजुल हुइना बटैली ।

राष्ट्रिय मानव अधिकार आयोगके प्रदेश प्रमुख मोहनदेव जोशी कानुनके प्रभावकारी कार्यान्वयन नइहुइल बटैलै । कानून बनाके वेवसाइटमे रख्ना केल नाही प्रचार प्रसार कैना जरुरी रहल बटैलै ।
राष्ट्रिय प्रजातन्त्र पार्टीके प्रदेश संयोजक दुर्गादत्त पन्त एक आपसमे बँझना कानून बनाइल बटैलै । मानव अधिकारका लागि महिला एकल महिला समुहके प्रदेश अध्यक्ष सुमन शर्मा, नेपाली काँग्रेस कैलालीके प्रवक्ता तपेन्द्र भुषाल लगायत अपन बाट राखल रहिट । नेपाल कानून समाजसे आयोजना करल कार्यक्रमके संचालन नरेन्द्र शाह करले रहिट ।