घुरहा पुलके पुर्वक भागमे भारी भ्वाङ
समयमे मर्मत नैहुइलेसे दुर्घटनाके सम्भावना
पहुरा समाचारदाता
हसुलिया, ६ कुवाँर । कैलालीके कैलारी गाउँपालिका वडा नम्बर ६ ओ ४ (भगतपुर–के गाउँ) जोरना घुरहा लडियामे बनल घुरहा पुलके पुर्वक माटी बाढसे भस्काइलपाछे भारी दुघर्टना हुइना सम्भावना रहल बा ।
यिहे कुवाँर १ गते आइलसे उ पुलके पुर्वक भागके माटी भस्काइलपाछे अब्बे ओहोरसे मोटरसाइकल, साइकलसे ओहोर दोहोर कैना अप्ठ्यारो रहल कैलारी गाउँपालिका गाउँपालिकाके अध्यक्ष राजसमझ चौधरी बटैलै । पुल निर्माणके करेबेर ठेकेदारके लापारवाहीके कारण जबफे पुलके पुर्वक भागमे समस्या आइल उहाँ बटैलै । गाउँपालिकाके बजेटसे ओकर समस्या समाधान नैहुइना ओरसे ओकर लाग संघसे भारी बजेटके माग कैना गाउँपालिका अध्यक्ष बटै ।
निर्माण करुइया ठेकेदार पुर्वक भागमे पुलके पेटी नैबनाइल कारण सालोसाल यी समस्या आइल कैलारी–४ के वडाध्यक्ष ठागुराम चौधरी बटैलै । उहाँ कहलै, पुलके पुर्वक भागमे मर्मत सम्भार, माटी फिलिङके लाग गाउँपालिकासे सालोसाल बजेट छुटाइना बाध्य बा, मने बर्खाक बेला जबफे भत्काके लैजाइठ । पालिकासे डारल बजेट ओस्टे खेर जैटी बा ।’ गैल बरस ओकर मर्मत ओ माटी फिलिङके लाग पालिकासे ४ लाख बजेट छुटयाके मर्मत कैगिल । यी बरस भरर्खर असार महिनामे फेरसे १ लाख बजेट छुटके मर्मत हुइल रहे अब्बे फेरसे उहे हाल बा, अध्यक्ष कहलै ।
पुलके पुर्वक भागमे पेटी रहल कारण सालोसाल माटी भस्कैना÷पुहैना समस्या बा । उ पुलमे अब्बे चारपहिया गाडी आवटजावट पुरा रुपसे बन्द हुइल बा । मजासे अनसिखुवा मोटरसाइकल, साइकल चालक रहलेसे खटहा जैना सम्भावना बा ।
पैडरसे आवाटजावट करे सेक्ना केल अवस्था रहल कैलारी–६ भगतपुरके पूर्व भल्मन्सा राजाराम चौधरी बटैठै । उहाँ कहलै, यी डगर रातके आवाटजावट कैना मनै दुर्घघनामे पर्ना सम्भावना बा । दिनके नेंगुइया मने डेखे सेक्ठै मने रातके यी डगर आवाटजावट कैना चार पहिया गाडी, डल्व, मोटरसाइकल दुर्घटनामे परे सेक्ना सम्भावना बा ।’
छाडा गोरुनके समस्या हुइलक कारण धानवाली बचाइक लाग हमे्र यी पुलमे रातके १२÷१ बजे जाग्रम बैठठी,’ उहाँ कहलै, ‘रातके यी डगर आवाटजावट कैना मनैनहे अभिनसम सचेत हुके जाउ कहले बटी । उहीसे रात अउयाजाउइया डगर विगरल पत्ता नइरहल मने दुर्घटनामे परे सेक्ठै ।’
पुल बनलपाछे अभिनसम अस्टे समस्या रहल पुर्व भल्मन्सा राजाराम बटैठै । अभिनसम यी पुलके पुर्वक भाग बहुट ढेर दुर्घटना हुइल ओ कुछ मनै ज्यानफे गुमाइल उहाँ बटैठै ।
