क्षमता अभिबृद्धि तालिम

पहुरा समाचारदाता
कञ्चनपुर, ७ कुवाँर । कञ्चनपुरके लालभाडी गाउँपालिकामे बालअधिकार चेतना समुहके पदाधिकारीहुकनहे क्षमता अभिवृद्धि तालिम डेहल बा ।

अनौपचारिक क्षेत्र सेवा केन्द्र (इन्सेक) सुदुरपश्चिम प्रदेश कार्यालयसे उ पालिकामे संचालित स्थानीय समुदायहे सचेत परटी जिम्मेवार निकायहे जवाफदेही बनाइक लाग तालिमके आयोजना करल रहे । तालिम समापन कार्यक्रमके वडका पहुना लालझाडी गाउँपालिकाके अध्यक्ष निर्मल राना मानवअधिकार सम्बन्धी कार्यक्रम संचालन करेक लाग अपन पालिकाहे छनौट करलमे धन्यवाद ज्ञापन करटी पालिकाके ६ माध्यमिक बिद्यालयमे बालअधिकार सम्बन्धी कार्यक्रम संचालन कैना आग्रह करलै ।

गाउँपालिकाके उपाध्यक्ष सपना चौधरी (राना) तालिममे सहभागी बालबालिकाहुकनहे अपन सिखल ज्ञानहे अपन संघरीयाहेफे बँटना आग्रह करली । इन्सेक सुदुरपश्चिम प्रदेश कार्यालयके संयोजक खडकराज जोशी निर्वाचित जनप्रतिनीधी तथा कार्यरत कर्मचारीहुक्रे निर्धारित सेवा समयमे आम नागरिकहुकनहे प्रवाह कैना उहाँहुकनके कर्तब्य रहल बटैटी इन्सेकसे विगत नम्मा समयसे मानवअधिकार ओ सामाजिक न्यायके क्षेत्रमे क्रियाशिल रहल बटैलै ।

लालझाडी गाउँपालिकामे गठन हुइल बालअधिकार चेतना समुह, कुछ दिनमे गठन हुइ लागल मानबअधिकार समुह मार्फत शिक्षा, स्वास्थ्य, लैङ्गिक विभेद, जातीय छुवाछुत, वातावरणके अधिकार लतायतके क्षेत्रमे समन्वय ओ सहकार्य करके कार्यक्रम संचालन कैना बटैलै ।

भानु माध्यमिक विद्यालयमे गठित बालअधिकार चेतना समुहके संरक्षक शिक्षक टेकराज जोशी बालबालिकाहुकनहे लाग एकदम महत्वपुर्ण विषय वस्तुमे प्रशिक्षण कराइलमे इन्सेकहे धन्यवाद डेलै । बालबालिकाके क्षेत्रमे सम्वेदनशिल हुके बजेट विनियोजन तथा नीति निर्माण करडेना गाउँपालिका प्रमुखहे आग्रह करलै ।

क्षमता अभिवृद्धि तापलममे दुई दिन सम बालअधिकार ओ बालश्रम, नेपालमे बालअधिकार सम्बन्धी कानुनी व्यावस्था तथा बालअधिकार सम्बन्धी अन्तराष्ट्रिय कानुन, लैगिंक हिंसा ओ जातीय छुवाछुत, बालभित्ते पत्रिका प्रकाशन, विद्यालय तथा समाज वातावरणमैत्री बनैना वालवालिकाहुकनके भुमिका, संगठन व्यवस्थापन ओ नेतृत्व शैली, वालअधिकार ओ जिम्मेवारी लगायतके विषयवस्तुमे सहभागी वालवालिकाहुकनहे इन्सेक सुदुरपश्चिम प्रदेश कार्यालयके प्रमुख खडकराज जोशी, कार्यक्रम फोकल पर्सन राजकुमार चौधरी, कार्यक्रम सहजकर्ता कैलाश पनेरु तथा लालझाडी गाउँपालिकाके शिक्षा शाखा प्रमुख सिद्धराज भट्ट सहजीकरण करल रहिट । तालिमसे बालबालिकाहुक्रे आ अपन विद्यालयमे संचालन कैना क्रियाकलापके कार्ययोजना समेत बनाइल शारदा राष्ट्रिय माध्यमिक विद्यालयमे गठित बालअधिकार चेतना समुहके अध्यक्ष आरती सेठी बटैलै ।