सत्तारुढ भातृ तथा युवा सङ्गठनसे ज्ञापनपत्र
पहुरा समाचारदाता
धनगढी, ७ कुवाँर । सरकारमे सहभागी दलके कैलालीस्थित टमान भातृ तथा युवा सङ्गठन नागरिकता विधेयकमे राष्ट्रपतिके कदमके विरोध जनैले बटै । विरोध स्वरुपसहित शुकके रोज कैलालीके प्रमुख जिल्ला अधिकारी किरण थापा मार्फत राष्ट्रपति कार्यालयहे उ विधेयक प्रमाणीकरणके लाग ज्ञापन पत्र बुझैले बटै ।
राष्ट्रपति विद्यादेवी भण्डारी दुनु सदनसे पारित हुइल नागरिकता विधेयकमे प्रमाणीकरणके लाग डेखाइल लापरवाहीप्रति ओइनके संयुक्त ज्ञापनपत्र मार्फत विरोध जनाइल नेपाल तरुण दल कैलालीके जिल्ला अध्यक्ष दिपेन्द्र बहादुर बम बटैलै ।
नेपाल तरुण दल कैलालीके जिल्ला अध्यक्ष दिपेन्द्र बहादुर बम अध्यक्ष, योङ कम्युनिस्ट लिग नेपाल कैलालीके संयोजक भेष राज जैसीसे हस्ताक्षरित विज्ञप्तीमे कहल बा, ‘राष्ट्रपतिके यी कदमके विरुद्धप्रति सचेत रहन संघीय लोकतान्त्रिक गणतन्त्रात्मक संवैधानिक व्यवस्थाके पक्षधर सक्कु राजनैतिक दल, भातृ तथा युवा सङ्गठन नागरिक समाज, बौद्धिक समुदाय, श्रमजीवी वर्ग, सञ्चार जगत्, लगायत सक्कु नेपाली डाडु भैया तथा डिडी बहिनीयामे हम्रे संयुक्त भातृ तथा युवा सङ्गठनके ओरसे हार्दिक आह्वान करटी ।
नागरिकता विहीन नेपाली नागरिकहुकनहे नागरिकता प्राप्त कैना संवैधानिक अधिकारसे वञ्चित हुइना करके राष्ट्रपतिसे राष्ट्रके गम्भीर जनताके संवैधानिक अधिकारसंग जोरल विषयमे खेलवाड कैना ओ सीमित राजनीतिक पार्टीके कार्यकर्ता जैसिक हुके पदके मर्यादासे बाहेर जाके करल संविधान विरोधी कदम सच्यइक लाग जोडदार माग करटी ।’
राष्ट्रपतिके यी कदमसे नागरिकता विहीन नेपाली नागरिकहुकनहे नागरिकता प्राप्त कैना संवैधानिक अधिकार वञ्चित करल बम बटैलै । संघीय लोकतान्त्रिक गणतन्त्र नेपालके संविधान २०७२ के पूर्ण पालना ओ संरक्षणके लाग ज्ञापनपत्र मार्फत आग्रह करल उहाँ बटैलै ।
