अध्यक्षमे सानु चौधरी निर्वाचित

पहुरा समाचारदाता
कञ्चनपुर, ९ कुवाँर । थारु कल्याणकारीणी सभा कञ्चनपुरके नवौं जिल्ला अधिवेशन लावा कार्यसमिति चयन करटि शनिच्चरके रोज निप्टल बा ।

थाकस कञ्चनपुरके अध्यक्षमे सानु चौधरी निर्वाचित हुइल बटि । उहाँ प्रतिद्वन्द्वी रोशन चौधरीहे ८ मतान्तरसे पराजित करैले रहि । सोनु २९ मत पैले रहि कलेसे रोशन २१ मत पैले रहैं ।

कार्यसमितिके उपसभापतिमे आँशुराम चौधरी, रतनलाल राना ओ अम्बिका चौधरी, सचिवमे रेशम चौधरी, सहसचिवमे राजकुमार चौधरी ओ कोषाध्यक्षमे वसन्ती चौधरी चयन हुइल बटैं । ओस्टेके, सदस्यमे कुमारीलक्ष्मी चौधरी, जुहारीलाल चौधरी, चन्द्रप्रसाद चौधरी, सीता डंगौरा, टेकबहादुर चौधरी, प्रकाश राना, जगदिश चौधरी, ज्ञानु चौधरी, सीता चौधरी चयन हुइल बटैं ।

ओस्टेके, हरिराम चौधरी, लक्ष्मीनारायण चौधरी, गीता चौधरी, उदय चौधरी, दुलारे राना, आरती चौधरीहे केन्द्रीय पार्षदमे चयन करल बा ।

यकरआघे अधिवेशनके थारु कल्याणकारीणीके सभाके केन्द्रीय सदस्य प्रभातकुमार चौधरी एक समारोहके बीच उद्घाटन करले रहैं ।

कार्यक्रममे कञ्चनपुरके प्रमुख जिल्ला अधिकारी गोपालप्रसाद आर्याल, थाकसके सल्लाहकार देवीलाल चौधरी, कञ्चनपुर बेलौरी नगरपालिकाके नगरप्रमुख पोतीलाल चौधरी, थारु विद्यार्थी समाजके केन्द्रीय सदस्य ठाकुर करियाप्रधान, थाकस कैलालीके कार्यवाहक सभापति माधव थारु, वडा नम्बर ५ के वडाध्यक्ष लालबहादुर चौधरी, नेपाल रानाथारु समाजके केन्द्रीय सदस्य प्रेमवती राना, थाकस कञ्चनपुरके पुर्व सभापति बासुदेव रानालगायत मन्तव्य व्यक्त करले रहैं ।

थाकस सभापति मेवाराम चौधरीके अध्यक्षमे हुइल कार्यक्रम सञ्चालन उपाध्यक्ष सानू चौधरी कैले रहिंट । कार्यक्रममे स्वागत मन्तव्य नगरभलमन्सा अमरसिंह चौधरी करले रहैं ।

कार्यक्रममे वुद्धिजिवी, समाजसेवी, शिक्षक, विद्यार्थी, जनप्रतिनिधि लगायत लोगनके सहभागी हुइल रहिंट । ओस्टेके सामाजिक क्षेत्रमे योगदान डेहल टमान व्यक्तित्व ओ आजीवन सदस्य ओइनहे सम्मान फेन कैगैल रहे । संस्कृति संरक्षण सम्वर्धन करल लाग टमान साँस्कृतिक नाचगान फेन डेखागैल रहे ।