मिडिया कप फुटसल सुरु

पहुरा समाचारदाता
धनगढी, १३ कुवाँर । कैलालीके धनगढीमे विफेसे निसर्ग हस्पिटल एनएसजेएफ मिडिया कप फुटसल प्रतियोगिता सुरु हुइल बा ।

खेलकुद पत्रकार मञ्च कैलालीके आयोजनामे दुसरा संस्करणके मिडिया कप फुटसल प्रतियोगिता सुरु हुइल हो । प्रतियोगिताके पहिल दिन विफेक रोज लिग चरणके खेल सम्पन्न हुइल बटै । ६ टिमहे दुई समूहमे विभाजन करके लिच चरणके खेल खेलाइलमे सेमीफाइनल पुग्न चार टिमके टुंगो लागल बा । समूह क से आयोजक खेलकुद पत्रकार मञ्च समूह विजेता ओ अत्तरिया पत्रकार समूह उपविजेता हुके सेमीफाइनलमे पुगल बटै ।

ओस्टेक समूह बी से चडेपानी ब्वाइज समूह विजेता ओ पत्रकार महासंघ कैलाली समूह उपविजेता हुके अन्ति चारमे पुगल बा । विफेक हुइल पहिल खेलमे खेलकुद पत्रकार मञ्च कैलालीसे अत्तरिया पत्रकार समूहहे १४–५ से हराइल । दुसरा खेलमे पत्रकार महासंघ कैलाली घोडाघोडी पत्रकार समूहहे ७–४ से पराजित करले बा ।

ओस्टेक टिसरा खेलमे अत्तरिया पत्रकार समूहसे टिम बर्दगोरीयाहे ७–१ से पराजित करटी सेमीफाइनलमे स्थान सुरक्षित बनाइल । चौथा खेलमे चडेपानी ब्वाइजसे टिम घोडाघोडीहे ६–२ से पराजित करले बा । आजु हुइल लिग चरणके छैठौं खेलमे आयोजक खेलकुद पत्रकार मञ्च टिम बर्दगोरियाहे १८–१ के फराकिलो अन्तरसे जित निकरटी अन्तिम चार स्थान सुरक्षित बनाइल । लिग चरणके अन्तिम खेलमे चडेपानी ब्वाइजसे पत्रकार महासंघ कैलालीहे ७–३ से पराजित करल हो ।

प्रतियोगिताअन्तर्गत काल्ह पहिल सेमीफाइनलमे आयोजक खेलकुद पत्रकार मञ्च कैलाली ओ पत्रकार महासंघ कैलालीबीच हुइना बा कलेसे दुसर सेमिफाइनलके खेल चडेपानी ब्वाइज ओ अत्तरिया पत्रकार समूहबीच हुइना बा । काल्ह फाइनल खेलफे हुइना आयोजक खेलकुद पत्रकार मञ्चका अध्यक्ष प्रदीप पाठक जानकारी डेलै ।

प्रतियोगिताके मुख्य प्रायोजक धनगढीके निसर्ग अस्पताल रहल बा कलेसे गौरीशंकर डेन्टर क्लिनिक सहप्रायोजक रहल बा । प्रतियोगिता आयोजनामे एसपीए कलेज, मायामेटे अस्पताल, संजिवनी अस्पताल, ज्योती आयल स्टोर, रिया स्पोर्टस हाउस, मिश्र जनरल स्टोर, सिंह जनरल स्टोर, नेपाल वेस्टर्न कलेज, रुसलान, डल्लुज फुटसल लगायत सहयोग करले बटै ।