नवजीवन अस्पतालहे ४० विद्यार्थीन नर्सिङ अध्ययन कैना अनुमति

भर्ना अभियान डसिया लग्गटे सुरु कैना

पहुरा समाचारदाता
धनगढी, १४ कुवाँर । नवजीवन अस्पताल प्रालि धनगढीहे ४० जाने विद्यार्थीनहे पि.सि.एल. नर्सिङ अध्ययन कैना अनुमती प्राप्त हुइल बा ।

शुकके रोज धनगढीमे पत्रकार सम्मेलनके आयोजना करके डसिया देवारीके शुभकामना अदान प्रदान कार्यक्रम सग्गे पि.सि.एल. नर्सिङ अध्ययन कैना अनुमती प्राप्त हुइल ओरसे डशिया लग्गटे भर्ना अभियान सुरु कैना उ अस्पताल व्यवस्थापन समितिके अध्यक्ष यज्ञराज ढुङगाना बटैलै ।

२०६२ साल फाल्गुण ११ गते १५ शैयाके अस्पतालके स्वीकृती लेके संचालन करटी आइल यी नवजीवन अस्पताल सुदूरपश्चिम प्रदेशके नीजि स्तरके लगानीसे संचालित पहिल नीजि अस्पताल हो ।
यी अस्पताल २०६८ सालसे स्वास्थ्य सेवा विभाग काठमाण्डौसे ५० शैयाके संचालन स्वीकृती लेके संचालनमे रहलमे यिहे आर्थिक बर्षसे १०० शैया स्तरोन्नती करल अध्यक्ष ढुङगाना बटैलै ।

अस्पताल नीजि लगानीमे संचालन हुइलेसेफे सामाजिक उत्तरदायित्व अनुरूप अपने पहलमे ओ नेपाल सरकारसंगके सहकार्यमे भारी ओ छोट करके स्थापना कालसे स्वास्थ्य शिविर संचालन करति आइल बा ।
यी अस्पतालसे नेपाल सरकारसंग हातेमालो करटी आमा सुरक्षा कार्यक्रम, खोप कार्यक्रम, क्षयरोगके विरामीके निःशुल्क औषधी वितरण कार्यक्रम, स्वास्थ्य विमा कार्यक्रम समेत संचालन करटी आइल अध्यक्ष ढुङगाना बटैलै ।

अस्पतालके मेसु डा विदुरमणि ढकाल यी क्षेत्रमे ढेर विद्यार्थी पि.सि.एल. नर्सिङ अध्ययन कैनासे बन्चित हुइल ओरसे यी भारी अवसर रहल बटैलै ।
उहाँ कहलै, ‘अस्पतालसे सुरु कैना पि.सि.एल. नर्सिङ पह्रना ४० जनहन मन्से ४ जाने छात्रबृतिमे निःशुल्क अध्ययन करे पैही ।‘
यी अस्पतालसे विगतके दिनमे कोभिड संक्रमणके बेला नेपाल सरकारसे हातेमालो करटी अपन स्रोत ओ साधनसे भ्याइटसम कोरोना माहामारी नियन्त्रणमे भरमग्दुर प्रयास करल ओ उ समयमे टड्कारो रुपमे डेखा परल अक्सीजन अभावके समस्याहे ह्दयंगम करटी अस्पतालसे अपने लगानीमे अस्पताल प्राङगणमे अक्सिजन प्लान्ट समेत स्थापना करल उहाँ बटैलै । यी अस्पताल एक महिना आघे डायलाशिस सेवा सुरु करल बा । कलेसे हाली सिटी स्क्यान ओ एमआरआई मेसिन नन्टी रहल मेसु डा ढकाल बटैलै ।

यी अस्पतालसे प्रत्येक दिन विशेषज्ञ डाक्टरसे हाड जोर्नि तथा नसा रोग, प्रसुती तथा महिला रोग, बालरोग, सर्जन, मानसिक तथा स्नायुरोग, पेट, छाती तथा मुटुरोग, एनेस्थेसियोलोजिष्ट एवं क्रिटीकल कंवर सेवा, डाइलासिस, छाला (धर्मरोग), एजली, यौन रोग, (गुप्तरोग, नाक, कान तथा घाँटी रोग सेवा डेटी आइल बा ।