नवज्योति सहकारीके दुसरा तल्लाके उदघाटन
पहुरा समाचारदाता
धनगढी,१६ कुवाँर । कैलालीके धनगढी उप–महानगरपालिका–७ स्थित नवज्योति कृषि सहकारी संस्था लिमिटेडके दुसरा तल्लाके उदघाटन हुइल बा ।
कार्यक्रमके वडका पहुना सुदुरपश्चिप प्रदेश सभा सदस्य माननीय मालामती राना उ सहकारीके दुसरा तल्लाके उदघाटन करल रहिट । उदघाटन कार्यक्रममे बोल्टी उहाँ यी सहकारी छोट समयमे ढेर फड्को मारल बटैली । यी सहकारीसे प्रगति करटी आइल रहे,’ उहाँ कहली–‘मै अपने करल सहयोगसे यी सहकारीमे पहिलेसे ढेर प्रगति कैना जिम्मेवारी अपनैनके बा । आशा बा अपनेहुक्रनके यी सहकारीसे उन्नति प्रगति हुई ।’
कार्यक्रमके विशिष्ट पहुना संविधान सभा सदस्य तथा नवज्योति कृषि सहकारी संस्था लिमिटेडके सल्लाहकार संयोजक प्यारेलाल राना यी सहकारीहे छोट समयमे यहाँसम पुगैना शेयर सदस्य, कर्मचारी, बचतकर्ताके योगदान रहल बटैलै । उहाँ कहलै, ‘यी सहकारीसे सुपथ मूल्य पसलसे वार्षिक ३ लाखके आम्दानी करठ । यी आम्दानी हम्रे सक्कु शेयर सदस्यके आम्दानीफे हो । हम्रे शेयर सदस्य बढाई पर्ना बा ।’
प्रदेश पुर्वाधार विकास कार्यक्रम अनुदानके रु. ४० लाख निकासा प्राप्त रकम रु. ३७ लाख ३९ हजार ९४५ रुपैया ओ सहकारी संस्थाके आन्तरिक खर्च रु.३२ लाख ६० हजार ५५ रुप्या करके जम्मा खर्च ७० लाखमे सहकारीके दुसरा तल्लाके निर्माण हुइल बा ।
ब्याजदर नव ज्योति कृषि सहकारी संस्था लि. का सदस्य मनोज बिक्रम दहित प्रस्तुत करले रहिट । सहकारी विभागके मिति २०७९ –०४–३१ के निर्देशन बमोजिम २०७९ भदौ मसान्तसम्मके वित्तीय विवरण नवज्योति कृषि सहकारी संस्था लि. के व्यवस्थापक उग्रसेन राना प्रस्तुत करले रहिट ।
नवज्योति कृषि सहकारी संस्था लि. के अध्यक्ष तथा धनगढी वडा नं ७ के निवर्तमान वडा अध्यक्ष सिताराम रानाके अध्यक्षतामे हुइल कार्यक्रममे वडा नं ७ के वडा सदस्य बासु रानाथारु, धनगढी वडा नं ७ निवर्तमान वडा सदस्य यमुना भट्ट जोशी, देवहरिया सामुदायिक वन उपभोक्त समुहके अध्यक्ष शारदा प्रसाद राना, देवहरिया गाउँके भलमन्सा जगन्नाथ राना, सक्कु शेयर सदस्य, समाजसेवी, बुद्धिजिवी, कर्मचारीके उपस्थिति रहे । कार्यक्रमके संचालन नवज्योति कृषि सहकारी संस्था लि. व्यवस्थापन समितिका सचिव भीराराम राना करले रहिट ।
