अवकाश पैना स्वयं सेविकनहे १ लाख नगद डेना कैलारीके निर्णय

पहुरा समाचारदाता
हसुलिया, २४ कुवाँर । कैलालीके कैलारी गाउँपालिकासे अवकाश हुइना महिला स्वास्थ्य स्वयं सेविकाहुकनहे एक लाख नगदसहित विदाई कैना निर्णय करले बा ।

कार्यपालिकाके कुवाँर ८ गतेक निर्णय अनुसार आबसे अवकाश पैना स्वयं सेविकाहुकनहे नगद एक लाख नगदसहित स–सम्मान विदाई कैना गाउँपालिका अध्यक्ष राजसमझ चौधरी बटैलै ।
स्वास्थ्य स्वयं सेविकाहुक्रे दिनरात नइकहिके बोलाइल बेला जबफे खटना करल बटै,’ अध्यक्ष कहलै, ‘ओइने विना तलब सेवा डेटी रहल बटै । न्यूनतम भत्तामे काम करठै । सेवासे निवृत हुइना बेला खाली हात जैठै ।’

स्वास्थ्य स्वयं सेविकाहुकन डेहल योगदानके कदर करटी आबसे विदा हुइना बेला एक लाख डेना निर्णय हुइल अध्यक्ष बटैलै ।
गाउँपालिकासे महिला स्वास्थ्य स्वयं सेविकाहुकनहे प्रोत्साहनसहित मासिक पाँच सय रुप्या डेना निर्णय हुइल सामाजिक विकास अधिकृत यगम कलेल जनैलै ।