म्यादी प्रहरीके परिक्षाफल प्रकाशित
पहुरा समाचारदाता
धनगढी,२६ कुवाँर । प्रतिनीधी तथा प्रदेश सभा सदस्य निर्वाचन, २०७९ सम्पन्न करेक लाग दरखास्त दर्ता करल म्यादी प्रहरीहुकनके परिक्षाफल प्रकाशित हुइल बा । प्रतिनीधी तथा प्रदेश सभा सदस्य निर्वाचन चुनाव अइना अगहन ४ गते हुइना बा ।
जिल्ला प्रहरी कार्यालय कैलाली तथा मातहत समेतमे दरखास्त दर्ता करके जिल्ला प्रहरी कार्यालय कैलालीसे संचालन हुइल मन्से सक्कु परीक्षा उत्तीर्ण हुइल म्यादी प्रहरीहुकनके परिक्षाफल प्रकाशित कैगिल प्रहरी निरिक्षक खगेन्द्र सिंह साउँद जनैलै ।
कैलाली जिल्लामे दरखास्त दर्ता करल पूर्व सुरक्षाकर्मी, पूर्व म्यादी १ हजार ७ सय ५८ जाने ओ नयाँ दर्ता हुइल १ हजार ५४ जाने उत्तीर्ण हुइल म्यादी प्रहरी भर्ना तथा छनौट उपसमितिके सदस्य सचिव प्रहरी निरिक्षक खगेन्द्र सिंह साउँद बटैलै । ओस्टेक करके २ सय ६७ जानेक वैकल्पिकमे नाउँ निकरल बा ।
मुख्य उम्मेद्वारहुकनके रुपमे उत्तीर्ण हुइल उम्मेदवारहुक्रे कुवाँर २७ गते विफेक रोज सकारे ७ बजे धनगढी नमुना प्राविधिक मा.वि. (भाषा स्कुल) के खेल मैदानमे नियुक्तिपत्र बुझेक लाग सक्कल नागरिकता प्रमाणपत्र सहित उपस्थित हुइना कहल बा ।
निर्वाचनमे खटना म्यादी प्रहरी कार्य अवधि ४० दिनके रहना बा । म्यादी प्रहरीके लाग प्रतिदिन रु ८६९ के दरसे ४० दिनसमके लाग ओइनके व्यक्तिगत खातामे जमा हुइना बा । म्यादी प्रहरी ३४ हजार ७ सय ६० रुप्या प्राप्त करही ।
म्यादी प्रहरीहुकनहे खाद्यन्न बाफत प्रतिव्यक्ति ७ हजार २ सय रुप्या व्यवस्था रही कलेसे हिमाली जिल्लामे खटना म्यादी प्रहरीहुकनके हकमे जिल्लाके न्युनतम राशन दररेट अनुसारके रकम पैही । तोकल पोशाक तथा अन्य सामान खरिदके लाग प्रति व्यक्ति ६ हजार पैही । हिमाली जिल्लामे खटना म्यादी प्रहरीहुकनहे गाढ निला रंगके कपराके ज्याकेट खरिद कैना प्रतिव्यक्ति थप रु १ हजार पैना जनागिल बा ।
निर्वाचनके क्रममे खटना म्यादी प्रहरीहुकनहे खटल ठाउँसे अइना जैना तयारी स्वरुप प्रति म्यादी एकमुष्ट एक हजार पैही कलेसे ३ सयके दरसे चार दिनके खाजा खर्च पैना कहल बा ।
