नागरिक उन्मुक्ती पार्टीके उम्मेदवार लक्ष्मणके उम्मेवारी बदर
पहुरा समाचारदाता
धनगढी,२५ कुवाँर । कैलाली क्षेत्र नम्बर ५ से प्रतिनिधि सभा सदस्यके लाग लक्ष्मण चौधरीसे दर्ता करल उम्मेदवारी बदर हुइल बा ।
यिहे अइना अगहन ४ गते हुइना चुनावके लाग लक्ष्मण चौधरी प्रतिनिधि सभा सदस्यके लाग नागरिक उन्मुक्ती पार्टीसे उम्मेदवारी डेहल रहिट । मुख्य निर्वाचन अधिकृतके कार्यालय कैलालीमे स्वतन्त्र उम्मेदवार रामबहादुर सिंहसे लक्ष्मण चौधरीके उम्मेदवार मनोनयन पत्र खारेजके लाग उजुरी दर्ता करैले रहिट ।
वारेसमार्फत कैलाली निर्वाचन क्षेत्र नम्बर ५ से प्रतिनिधिसभा सदस्यमे उम्मेदवारी डेहल चौधरीके उम्मेदवारी बदर हुइल मुख्य निर्वाचन अधिकृतके कार्यालय जनैले बा । टीकापुर घटनाके आरोपमे ज्यान मर्ना उद्योगमे जिल्ला अदालत कैलालीसे सजाय हुइल ओ उच्च अदालतसे कर्तव्य ज्यान मुद्दामे जन्म कैदके सजाय तोकले बा । लक्ष्मणके उम्मेदवारी खारेज कैना माग करटी डारल निवेदनउप्पर सुनवाइ करटी मुख्य निर्वाचन अधिकृत ओमप्रकाश अर्याल उम्मेदवारी बदर हुइना निर्णय सुनाइल हुइट ।
मुख्य निर्वाचन अधिकृतके कार्यालयसे लक्ष्मण चौधरीहे मंगर दिनके ३ बजेभिटर प्रमाणसहित उम्मेदवारी बदर करे नइपर्ना कारण पेश कैना समय डेहल रहे । टीकापुर घटनामे मुछल लक्ष्मणहे उच्च अदालत दिपायलसे २ पुस २०७७ मे जन्म कैदके फैसला सुनाइल रहे । उ आघे जिल्ला अदालत कैलालीसे उहाँहे तीन वर्ष कैद सजाय तोकल रहे । उहाँ पुर्पक्षमे तीन वर्षसे ढेर बैठके छुटल रहिट ।
