पाठयक्रममे आधारित शिक्षक क्षमता विकास तालिम सुरु

पहुरा समाचारदाता
धनगढी, २६ कुवाँर । आधारभूत तह (कक्षा १–३) के एकिकृत ढाँचाके पाठयक्रममे आधारित सात दिने शिक्षक क्षमता विकास तालिम बुधसे धनगढीमे सुरु हुइल बा ।

सेतो गुराँस राष्ट्रिय बाल विकास सेवाके आयोजनामे सामाजिक विकास मन्त्रालय शिक्षा तालिम केन्द्र दिपायल डोटीके सहकार्य तथा कैलारी गाउँपालिका, पिसविन नेपाल कैलाली (शान्तिदिप) ओ युनिसेभके संयूक्त सहयोगमे ‘नेपालममा प्रारम्भिक बालशिक्षा र विकासको सवलीकरणका लागि प्रारम्भिक सिकाई तथा विकास मापदण्ड कार्यान्वयन परियोजना’ से शिक्षक क्षमता विकास तालिम डेहल हो ।

तालिमके उदघाटन करटी कार्यक्रमके वडका पहुना रहल कैलारी गाउँपालिकाके अध्यक्ष राजसमझ चौधरी सामुदायिक विद्यालयमे अध्ययनरत विद्यार्थी संख्या घटटी क्रमसंगे विद्यालय समायोजनफे हुइटी रहल बटैले बटै । शिक्षा क्षेत्रमे कैसिक सुधार करे सेक्जाई, गम्भीरताके साथ लागल उहाँ बटैलै ।

अब्बे मुख्य जिम्मेवारी शिक्षकहुकनके रहल बा,’ उहाँ कहलै, ‘सामुदायिक विद्यालयमे निःशुल्क रुपमे पठनपाठन हुइठ कहटी । मने सरकारके लगानी हेरेबेर सामुदायिक विद्यालय महगां शिक्षाके रुपमे विल्गाइठ ।’
उहाँ कहलै,‘ गाउँपालिकाभिटर रहल विद्यालयके समस्या का बा, हम्रे सक्कु विद्यालयसे रिर्पोट संकलन करले बटी । कौन विद्यालयमे कैसिक समस्या बा, हम्रे एकदमे सचेत बटी ।’

गाउँपालिकासे शिक्षा क्षेत्रमे लगानी कैना एकदम जोड डेहल अध्यक्ष बटैलै । पालिकाभिटर रहल विद्यालयमे स्थानीय भाषाके कोटा अभिनफे ठप्न उहाँ बटैलै । शिक्षकके भूमिका अहम रहल बटैटी उहाँ बाल विकास (इसिडी) ओ कक्षा १ मे ढेर ध्यान डेहे पर्ना बटैलै । शिक्षाके जग कहल शिक्षक हुइट, शिक्षक अपनही कम्जोर हुइलेसे जग बल्गर हुई नइसेकी शिक्षामे सुधार करे नइसेक्जाई । कैलारी गाउँपालिकामे चार ठो विद्यालयसे बाहेर इसिडी कक्षा संचालनमे रहलफे गाउँपालिका अध्यक्ष राजसमझ चौधरी बटैलै ।

कार्यक्रममे कैलारी गाउँपालिकाके शिक्षा शाखा प्रमुख गणेश प्रसाद मिश्र विद्यार्थीके भविष्य ओजरार ओर लैजैना जिम्मेवारी शिक्षकके हातमे रहल बटैलै । उहाँ कहलै विद्यालय जैना छोट बालबालिकाहे शिक्षकसे जा कहठै उहे सिक्ना हुइल ओरसे बाल विकास (इसिडी) ओ कक्षा १ मे ढेर ध्यान ढेहे परठ ।

एकिकृत ढाँचाके पाठयक्रममे आधारित शिक्षक क्षमता विकास तालिम संचालनके उद्देश्यबारे सेतो गुराँस राष्ट्रिय बाल विकास सेवाके कटक सिजापति जानकारी डेहल रहिट । उहाँ यी तालिम आधारभूत तह कक्षा १–३ के पाठयक्रमके आधारणबारे जानकारी कैना, विषयगत सक्षमता ओ सिकाई उपलब्धीबारे स्पष्ट कैना, विषय क्षेत्र अनुसार एकिकृत रुपमे शिक्षण सिकाई क्रियाकलाप संचालन कैना सक्षम हुइना, विद्यार्थी सिकाई लेखाजोखा प्रणालीबारे बुझाई प्रष्ट कैना, विद्यार्थी केन्द्रित शिक्षण विधि तथा शैक्षिक सामाग्री निर्माण ओ प्रयोगबारे क्षमता विकास कैना तालिमके आयोजना करल बटैलै ।

तालिम उदघाटन कार्यक्रम पिसविन नेपाल कैलालीके कार्यसमिति सदस्य हर्कबहादुर ओलीके अध्यक्षतामे हुइल रहे । संचालन पिसविन नेपाल कैलालीके जिल्ला परियोजना संयोजक शान्ति मगर ओ स्वागत मन्तव्य पिसविन नेपाल कैलालीके तालिम अधिकृत जानकी सिंह करले रहिट ।

कैलारी गाउँपालिकाके ४४ ठो विद्यालयके शिक्षक, शिक्षिकाहुकनके सहभागितामे हुइटी रहल एक हप्ते तालिममे सेतो गुराँस राष्ट्रिय बाल विकास सेवाके तालिम अधिकृत रमा थपलिया ओ कटक सिजापति प्रशिक्षण डेटी रहल बटै कलेसे सहजीकरण पिसविन नेपाल कैलालीके जिल्ला परियोजना संयोजक शान्ति मगर करटी रहल बटी ।