कैलालीमे आब १२६ जाने चुनावी प्रतिष्पर्धामे

उम्मेदवार चुनाव चिन्ह पाइलपाछे प्रचार प्रसारमे डौरलै

पहुरा समाचारदाता
धनगढी, २६ कुवाँर । कैलालीमे प्रतिनिधी तथा प्रदेश सभा निर्वाचनके लाग एक सय २६ जाने चुनावी प्रतिष्पर्धामे रहल बटै । जिल्लामे अँटवार टमान पदमे एक सय ४४ जाने उम्मेदवारी दर्ता कराइलमे बुधके रोज १८ जाने उम्मेदवारी फिर्ता लेहलपाछे एक सय २६ जाने चुनावी मैदानमे डौरल बटै ।

प्रदेश निर्वाचन कार्यालयके निमित्त प्रमुख प्रेमराज भट्ट प्रतिनिधि सभाके निर्वाचनमे ४८ जाने ओ प्रदेश सभामे ७८ जाने उम्मेदवारी फिर्ता नइलेहल जानकारी डेलै । पाँच निर्वाचन क्षेत्र रहल कैलालीके क्षेत्र नम्बर १ मे ११, क्षेत्र नम्बर २ म नौ, क्षेत्र नम्बर ३ मे आठ, कैलाली क्षेत्र नम्बर ४ मे १० ओ कैलाली क्षेत्र नम्बर ५ मे १० जाने करके ४८ जानेक उम्मेदवारी कायम रहल बा । बुधके प्रदेश सभामे उम्मेदवारी दर्ता कराइल १८ जाने फिर्ता लेले बटै ।

१० प्रदेश निर्वाचन क्षेत्र रहल कैलाली क्षेत्र नम्बर १ के प्रदेश सभा (१) मे नौ, प्रदेश सभा (२) मे ११, क्षेत्र नम्बर २ के प्रदेश सभा (१) मे ७, प्रदेश सभा (२) मे ९, क्षेत्र नम्बर ३ के प्रदेश सभा (१) मे ६, प्रदेश सभा (२) मा ९, क्षेत्र नम्बर ४ के प्रदेश सभा (१) मे नौ, प्रदेश सभा (२) मे ५, क्षेत्र नम्बर ५ के प्रदेश सभा (१) मे पाँच ओ प्रदेश सभा (२) मे आठ करके ७८ जानेक उम्मेदवारी कायम रहल बा ।

कैलाली क्षेत्र नम्बर ३ मे ६ जानेक उम्मेदवारी फिर्ता

कैलाली निर्वाचन क्षेत्र नम्बर ३ ममे स्वतन्त्र उम्मेदवारी डेहल ६ जाने बागी उम्मेदवार मनोनयन फिर्ता लेले बटै । प्रदेश सभा ‘क’ मे गठबन्धनविरुद्ध बागी उम्मेदवारी डेहल नेपाली काँग्रेसके नेता रामचरण चौधरी ओ नेकपा माओवादी केन्द्रके प्रदेश सदस्य छोटेलाल चौधरी उम्मेदवारी फिर्ता लेले बटै ।

ओस्टेक प्रदेश सभा ‘ख’ मे स्वतन्त्र उम्मेदवारी डेहल एमालेके मनराज शाही, पूर्णराज जोशी, एकीकृत समाजवादी परित्याग करल नेता मेघबहादुर साउँद ओ नेकपा माओवादी केन्द्रके घोडाघोडी नगर अध्यक्ष खगेन्द्र हमाल अपन उम्मेदवारी फिर्ता लेले बटै ।

आब कैलाली निर्वाचन क्षेत्र नम्बर ३ मे प्रतिनिधि सभा निर्वाचन लाग ८ जाने, प्रदेश सभा (क) मे ६ जाने ओ प्रदेश सभा (ख) मे ९ जानेक उम्मेदवारी कामय रहल निर्वाचन आयोग जनैले बा ।

कैलाली–४ मे ४ जानेक उम्मेदवारी फिर्ता

कैलालीके क्षेत्र नम्बर ४ के ‘ख’ से स्वतन्त्र उम्मेदवारी डेहल नेपाली काँग्रेसका नेता टिकादत्त जोशी उम्मेदवारी फिर्ता लेले बटै । उहाँ प्रदेश सभा सदस्य प्रकाश बमहे सहयोग कैना बटैले बटै । ओस्टेक नेपाली काँग्रेससे बागी उम्मेदवारी डेहल खगेन्द्र चौधरी, राजेन्द्र जोशी ओ टेकबहादुर देउवाफे उम्मेवारी फिर्ता लेहल नेपाली काँग्रेस गोदावरी नगर कमिटी सचिव अशोकराज देवकोटा जानकारी करैलै ।

देशभरमे ६०० जानेक उम्मेदवारी फिर्ता

प्रतिनिधि सभा ओ प्रदेशसभाके करिब ६ सय उम्मेदवार मनोनयनपत्र फिर्ता लेले बटै ।
निर्वाचन आयोगके अनुसार प्रतिनिधि सभामे ११४ सहित प्रदेशसभामे ४८३ जाने मनोनयनपत्र फिर्ता लेले बटै । यी उम्मेदवारी रद्द हुइलके संख्या समेत हो ।

निर्वाचन आयोगके अनुसार, प्रतिनिधिसभामे कुल २ हजार ५२६ जानेक उम्मेदवारी दर्ता हुइलमे अब्बे घटके २ हजार ४१२ पुगल बा । प्रदेशसभामे ३ हजार ४७६ जानेक उम्मेदवारी परलमे अब्बे घटके २ हजार ९९३ हुइल बा ।