नेपाली कांग्रेसके नेता जोशीसे उम्मेदवारी फिर्ता

पहुरा समाचारदाता
धनगढी, २८ कुँवार । बझाङ प्रदेश सभा ‘क’ के लाग स्वतन्त्र उम्मेदवारी डेहल नेपाली कांग्रेसके नेता जगतप्रसाद जोशी उम्मेदवारी फिर्ता लेले बटैं । उहाँ नेता कार्यकर्ताके आग्रहमे उम्मेदवारी फिर्ता लेहल शुकके रोज धनगढीमे पत्रकार सम्मेलन कैके जानकारी करैलैं ।

‘सुरुमे नेता कार्यकर्ताहुकनके उम्मेदवारी डेहेपरना दवाव डेलैं’, पत्रकार सम्मेलनमे उहाँ कलैं, ‘फेन अन्तिममे आके उहाँहुक्रे फिर्ता लेना आग्रह करल ओरसे ‘व्याक’ हुइनु ।” ४३ वर्षके राजनीति यात्रामे ७ ठो निर्वाचन हइलमे फेन अप्ने अवसर नैपाइल उहाँक गुनासो बा । उहाँ अपन स्वास्थ्य अवस्था समेत मजा नैरहल ओरसे अब्बे निर्वाचन लरे नैसेक्ना स्थितिमे पुगल बटैलैं ।

उहाँ अप्ने गठबन्धनके पक्षमे रहल पत्रकार सम्मेलनमे जानकारी करैलैं । ‘पार्टीके केन्द्र्रके निर्णय अनुसार आघे बह्रल बटु’, उहाँ कलैं । उहाँ उम्मेदवारी फिर्ता करलपाछे हुइल टिकाटिप्पणीके पाछे नैलग्ना समेत नेता कार्यकर्ताहे अनुरोध करले बटैं ।

बझाङ प्रदेश सभा ‘क’ मे गठबन्धनसे काँग्रेसके पृथ्वीबहादुर सिंह चुनावी मैदानमे बटैं । ओस्टेक, नेकपा एमालेके अफिलाल ओखेडा, राप्रपासे हरिलाल भट्टराई, राप्रपा नेपालसे कणर्बहादुर खड्का, नेस्नल पिपुल्स पार्टीसे भीमबहादुर खड्काके उम्मेदवारी बा ।