जिल्ला स्तरीय समन्वय बैठक

पहुरा समाचारदाता
हसुलिया, २ कार्तिक । कैलालीके कैलारी गाउँपालिकामे लागु हुइल ‘नेपाल जीविकोपार्जन तथा उत्थानशिलता कार्यक्रम’ के समिक्षा कैगिल बा ।

बुधके रोज हसुलियामे कारितास नेपाल जिल्ला स्तरीय समन्वय कार्यक्रमके आयोजना करके परियोजनासे गत बर्षके (सन २०१९ जुलाईसे २०२२ जुनसम) बार्षिक कार्यक्रमके संक्षिप्त प्रगती विवरण प्रस्तुत कैगिल बा । अष्टे«लियन एड, कारितास एडके सहयोगमे करितास नेपालसे कैलारीके तीन ठो सहकारीमे टमान गतिविधिके साथे आर्थिक सहयोग करल रहे ।

कार्यक्रमके वडका पहुना कैलारी गाउँपालिकाके अध्यक्ष राजसमझ चौधरी ओ विशिष्ट पहुना गाउँपालिका उपाध्यक्ष भगवतीकुमारी चौधरी ओ प्रमुख प्रशासकीय अधिकृत विरबहादुर ऐर रहल रहिट ।

कार्यक्रममे बोल्टी वडका पहुना गाउँपालिका अध्यक्ष राजसमझ चौधरी यी पालिकासे सहकार्य करके कार्यक्रम लागु कैटी आर्थिक सपोट कैडेलकमे कारितास नेपालहे धन्यवाद व्यक्त करले रहिट । उहाँ कहलै, ‘सहकारी बल्गर हुइलेसे शेयर सदस्यहे टमान मेरिक सहयोग करे सेकी । कैलारीके तीन ठो सहकारीहे बल्गर बनैना कारितासके महत्वपूर्ण भुमिका बा ।’

कार्यक्रमके विशिष्ट पहुना गाउँपालिका उपाध्यक्ष भगवतीकुमारी चौधरीे कारितास नेपाल महिलाहुकनसे संचालन करल सहकारीहे सपोट करके महिलाहुकन आघे बह्रना अवसर प्रदान करल बटैली । उहाँ कहली,‘ नेपाल जीविकोपार्जन तथा उत्थानशिलता कार्यक्रम लागु तीन ठो सहकारी पहिलेक तुलनामे अब्बे बहुट प्रगती करले बा । उ सहकारीके महिला शेयर सदस्य आर्थिक रुपमे अवसर मिलल बा ।’ कारितास नेपालसे संचालन करल परियोजना कैलारी गाउँपालिकाके और सहकारीहे समेटलेसे अपनेहुक्रे समन्वय सहकार्य कैना तयार रहल उहाँ बटैली ।

कार्यक्रममे कैलारी–५ के वडा अध्यक्ष विष्णु प्रसाद चौधरी, भजनी नगरपालिका–७ के वडा सदस्य रुपण लोनिया, कैलारी गाउँपालिकाके सामाजिक विकास अधिकृत यगम कलेल, समिक्षा महिला बहुउद्देश्यीय सहकारी संस्थाके अध्यक्ष उर्मिला चौधरीलगागत मन्तव्य करले रहिट ।

कार्यक्रममे प्रगतीबारे जानकारी डेटी कारितास नेपालके जिल्ला कार्यक्रम अधिकृत महेन्द्र प्रसाद थारु सीमान्तकृत तथा जोखिममे रहल जनसमुदायहे दिगो कृषि सहकारी तथा लघु व्यवसाय कार्यक्रम मार्फत दिगोपार्जनके लाग ओइनहे सशक्तीकरण करके आधारभुत आर्थिक सम्पन्नतामे सुधार कैना यी कार्यक्रम लागु हुइल बटैलै ।

कारितास नेपाल कैलारीके चेतनशिल महिला बहुउद्देश्यीय सहकारी संस्था, समिक्षा महिला बहुउद्देश्यीय सहकारी संस्था ओ पारदर्शि महिला बहुउद्देश्यीय सहकारी संस्थासे समन्वय करके कार्यक्रम करल रहे ।

कारितास नेपालके जिल्ला कार्यक्रम संयोजक खम्बसिंह बस्नेतके अभ्यक्षतामे हुइल कार्यक्रमके संचालन कार्यक्रम सहायक छेगुरा चौधरी करले करले रहिट । कार्यक्रममे कैलारी गाउँपालिका वडा नम्बर ७ के वडा अध्यक्ष दिपेन्द्रबहादुर बम, गाउँपालिकाके टमान शाखाके प्रमुख, कार्यक्रम लागु हुइल सहकारीके टमान प्रदाधिकारीहुकनके सहभागिता रहल रहे ।