‘पालिकाहे बालमैत्री बनैना तत्पर’

पहुरा समाचारदाता
हसुलिया, २ कार्तिक । कैलारी गाउँपालिकाके अध्यक्ष राजसमझ चौधरी पालिकाहे बालमैत्री बनैना तत्पर रहल बटैले बटै ।

दिगो विकास समाज भजनी, बाल कल्याण संघ टिकापुरके आयोजना तथा वल्र्ड भिजन इन्टर नेशनल नेपाल, कैलालीके साझेदारीमे बुधके रोज हसुलियामे हुइल ‘पालिका स्तरीय परियोजना परिचयात्मक कार्यक्रम’ मे उहाँ उ बाट बटवाइल रहिट ।

मुक्तकमैया, दलित, सुकुम्बासीहुकनके बालबालिकाहे विशेष ध्यान डेहे पर्ना अवस्था बा,’ अध्यक्ष कहलै, ‘गाउँपालिकामे बन्ना हरेक संरचना आबसे बालमैत्री बनाजाई । ओइनके परिस्थिति हेरके ओइनके आवश्यकता पहिचान करटी पालिका आघे बह्री ।’
हरेक दातृ निकायहे सिमित वडामे केल कार्यक्रम नइकरके पालिकाके सक्कु वडाके आर्थिक अवस्था कम्जोर रहल, विपन्न समुदायके बालबालिकाहे सपोट कैना आवश्यक रहल उहाँ बटैलै ।

उहाँ कहलै, कैलारी–३ शिवरत्नपुरके १६ परिवारहे मोहना लडिया पूर्णरुपमे घरवार विहिन बनैले बा । ओइनहे अवस्था अब्बे नाजुक बाटिन, अपने का खैना, लर्कन कैसिक पहै्रना अवस्थामे पुगल बटै । ओइनके बालबालिकाहुकनहे सपोट कैना आवश्यक बा ।’

ओस्टेक कैलारी–७ विपतपुरमे गैल बैशाख ११ गते भिषण आगलागी हुके २७ घर जरके भुवा बनल । ओइनके अवस्थाफे कर्रा बटिन, ओइनहे सपोट कैना ओर सरोकारवाला निकायके ध्यान जैना जरुरी रहल उहाँ बटैलै । स्थानीय तह लग्गेक सरकार रहल कारण पालिकाके बालबालिकाके अभिभावकत्वके जिम्मेवारी निर्वाहफे करटी रहल अध्यक्ष बटैलै ।

गाउँपालिकाके उपाध्यक्ष भगवतीकुमारी चौधरी पालिकाहे बालमैत्री बनैना सकारात्मक रहल बटैली । बाल कल्याण संघ कैलारीके वडा नम्बर ८ के बालबालिकाहे केल समेटके कार्यक्रम संचालन करटी आइल बा ।
गाउँपालिका उपाध्यक्ष तथा कार्यक्रमके विशिष्ट पहुना समस्यामे परल सक्कु वडाके बालबालिकाहे समेटके लैजैना आग्रह करली । गाउँपालिकाभिटर रहल सक्कु बालबालिकाहे सम्मान अधिकार डेना हमार कर्तव्य हो,’ गाउँपालिका उपाध्यक्ष कहली, ‘कुहीहे काखा कुहीहे पाखा कैलेसे बालबालिका मनोवलफे घटे सेकठ । यी संस्थासे अब्बे एक ठो वडा केल समेटले बा । सक्कु वडा समेटी कलेसे पालिकाफे समन्वय ओ सहकार्य करके आघे बह्री ।’

वडा नम्बर ८ के वडा अध्यक्ष तारामल कठरियाफे दिगो विकास समाज ओ बाल कल्याण संघहे और वडाहे समेटके आघे बह्रना आग्रह करलै ।

बाल कल्याण संघसे कैलारी गाउँपालिका–८ के १८३ बालिकाहुकन समेटके बाल स्पोन्सरसीप परियोजना अन्तर्गत टमान क्रियाकलाप आघे बह्राइल संघके प्रकाश विष्ट बटैलै । उहाँ यी परिजोजना मार्फत बालबालिकाहुकनहे शैक्षिक सामाग्री प्रदानसे लेके टमान गतिविधि संचालन करल जनैलै । ओस्टेक बाल कल्याण संघके परशु चौधरी बाल संरक्षण परियोजनाबारे जानकारी डेहल रहिट ।

ओस्टेक दिगो विकास समाज भजनीके पोषण तथा उत्थानशिल जिविकोपार्जन परियोजना अधिकृत प्रभुनाथ ढकाल यी परियोजनासे अभिनसम करल गतिविधिबारे जानकारी डेहल रहिट ।

कैलारी गाउँपालिकाके वडा नम्बर ८ मे संचालित यी परियोजनासे ४ जाने उत्पादन समुहके प्रतिनिधिहे टमान कृषि उत्पादन सामाग्री, सिलपाउलिन प्लाष्टिक, आइरन पाईप, इलोक्टोनिक्स स्प्रेयर टंकी, मलचिंङ, हजार, डिजिटल तराजु आधुनिक कृषि प्रविधि तालिम) प्रदान करके न्यूनतम २ कठ्ठा जमिनमे आधुनिक तरीकासे कृषि खेती करके आयआर्जन करटी आइल उहाँ बटैलै ।

एक ठो वटा नमुना प्रर्दशनी पलट स्थापन करके प्लाष्टिक घरमे तरकारी खेती, इन्सेक नेट, थोपा सिचाई, प्लाष्टिक मलचिंड, जैविक विषधि, बेमौषमी तरकारी नर्सरी जैसिन तरिका प्रर्दशन करके वरपरके १२० जाने कृषक तरीकाके वारेमे जानकारी पाके सिकाई अनुसरण करल अधिकृत बटैलै ।

ओस्टे १० जाने महिलाहुकनके कृषि कार्य कार्यबोज घटैना विडर मेसिन, बर्स कटर, सिड प्लान्टर, जस्ता कृषि यन्त्र वितरण करल बटैलै । पोषणके कमी हुइल १००० दिने डाईनहे २ दिने पोषण बगौचा स्थापना तालिम प्रदानपाछे २५ जानेक घरमे पोषण बगैचा स्थापना करके नियमित पोषण युक्त खाना खैना बानीमे सुधार आइल उहाँ जनैलै ।

ओस्टेक परियोजना अधिकृत ढकाल आर्थिक पुनस्र्थापना परियोजनाबारे जानकारी डेहल रहिट । यी परियोजना सन २०२३ जुनसम संचालन रहना उहाँ जानकारी करैलै ।

दिगो विकास समाज भजनीके अध्यक्ष रामबहादुर सुनारके अध्यक्षतामे हुइल कार्यक्रममे स्वागत मन्तव्य डिविएसके सहसचिव धनिराम राजी ओ संचालन फिल्ड सहजकर्ता गोविन्द जोशी करले रहिट । कार्यक्रममे कैलारी गाउँपालिकाके टमान शाखाके प्रमुख तथा प्रतिनिधि, कर्मचारी, कृषक समुहके प्रतिनिधि, दिगो विकास समाजके कर्मचारी तथा फिल्ड सहजकर्ता रमला चौधरी, बाल कल्णाण संघके कर्मचारीहुकनके सहभागिता रहे ।