सुर्मा साईपालके १३ औं वार्षिकोत्सव

पहुरा समाचारदाता
धनगढी, १५ कार्तिक । धनगढीस्थित सुर्मा साईपाल बचत तथा ऋण सहकारी संस्था १३ औं वार्षिकोत्सव धनगढी–१३ मे रहल दृष्टि फाउण्डेसनसंग मनैले बा ।

सहकारी संस्थाके अध्यक्ष मदनराज रेग्मी मानवीय सेवामे सहकार्य करना उद्देश्यसे दृष्टि फाउण्डेसनके कार्यालयमे वार्षिकोत्सव कार्यक्रम मनाइल बटैलैं ।

उ अवसरमे सहकारी संस्था दृष्टि फाउण्डसनहे ४ सेट सुट्ना खटिया उपलब्ध करैले बा कलेसे फाउण्डेसनमे रहल वेसहारा महिला तथा बालबालिकाहे खाजा खुवैले बा ।

कार्यक्रममे संस्थाके संस्थापक अध्यक्ष अमिर खाती, दृष्टि फाण्डेसन संस्थाके सञ्चालक कल्पना भट्ट, सेती प्रादेशिक अस्पतालके पूर्व मेडिकल सुपरिटेण्डेन्ट डाक्टर गणेशबहादुर सिंह, सहकारीके कानूनी सल्लाहकार दिलबहादुर खाती, सहकारीके उपाध्यक्ष नवराज रेग्मी, सहकारी संस्थाके सल्लाहकार सदस्य कर्णबहादुर जप्रेल, सल्लाहकार मदनराज जोशी, धनबहादुर विष्ट, कानूनी सल्लाहकार हरिप्रसाद उपाध्यायलगायत मन्तव्य व्यक्त करले रहैं ।

सहकारीमे हालसम १ हजार १ सय २३ जाने शेयर सदस्य आबद्ध बटैं ।

सुर्मा साइपाल सहकारी संस्थाके अध्यक्ष मदनराज रेग्मीके अध्यक्षतामे हुइल कार्यक्रमके सञ्चालन व्यवस्थापक दिनेश जोशी करले रहैं ।