नागरिक उन्मुक्तिके पार्टी भेला ओ प्रशिक्षण कार्यक्रम हुइल
पहुरा समाचारदाता
गुलरिया, १८ कात्तिक । नागरिक उन्मुक्ति पार्टीके पार्टी भेला ओ प्रशिक्षण कार्यक्रम हुइल बा ।
जिल्ला कंचनपुरके कृष्णपुर नगरपालिका ५ सयपत्री टोलमे भेला हुइल रहे । भेलामे पार्टीके प्रवक्ता दामोदर पान्डेय रहिंट ।
थारु आदिवासी हुइँट, थारु भुमिपुत्र हुइँट, ओहेमारे थारु बाहुल्य रहल ठाउँमे थारु लोग फेन सत्तामे अइना जरुरी रहल बटैलैं । उहाँ कहलैं, इ थारु बस्ती, इ मैदान बनैनामे थारुनके सबसे ढेर खुन पस्ना चुहल बा । आब थारु समुदाय अपन हक अधिकार ओ पहिचानके लाग एकजुट होके हिरगरसे लागे पर्ना बटैलैं ।
अइना अगहन ४ गते चुनावमे नागरिक उन्मुक्ति पार्टी से थारु उमेदवार ओइनहे जिटाइक लाग आब थारु लोग हिम्मत कस्के लागे पर्ना बटैलैं ।
कंचनपुर क्षेत्र नम्बर २ (क) के उमेदवार गीता चौधरी आब अइना दिनमे देश संचालन करक युवा शक्तिके ढेर जरुरत रहल बटैली । उहाँ कहली, मोर जित कलक थारु समाजहे शुसाशन, समृद्धि ओ पहिचान बनैना बटैली । इहे अगहन ४ गते सक्कु जहनके सहयोगके आपेक्षा फेन करली ।
कार्यक्रममे युवा गायक रामकुमार कठरिया थारु गीत मार्फत संदेश डेले रहिंट कलेसे गायिका सोमती थारु फेन अपन गीत मार्फत जन्तनहे जागरुक करैटी पहिचान ओ अधिकार मुलक गीत संगीत प्रस्तुत कैले रहि । आब थारु जागरुक ओ सचेत हुइना बेला इहे हो कहटी थारु समुदाय आवाज उठाइ पर्ना समय आइल बटैली ।
ओस्टेके कार्यक्रममे समानुपातिकके उमेदवार सरला परियार, प्रतिनिधि सभा प्रतिनिधिके उमेदवार पतिराम चौधरी लगायत नेता लोग मन्तव्य डेले रहिंट ।
स्वागत मन्तव्य जिल्ला सचिब पिताम्बर चौधरी डेले रहिंट कलेसे कार्यक्रम सहजिकरण उर्मिला गम्वाँ थारु कैले रहिंट ।
