निडस नेपालसे कैलारीमे हुइना विपद समस्याबारे छलफल
पहुरा समाचारदाता
हसुलिया, २० कार्तिक । निडस नेपालसे कैलारी गाउँपालिकामे हुइना विपद जोखिमबारे छलफल करले बा ।
केयर नेपालके आर्थिक सहयोगमे निडस नेपालसे कैलारी गाउँपालिकामे आपतकालिन बाढी बाढी प्रतिकार्य कार्यक्रम अन्र्तगत बाढी प्रभावित समुदायहे राहत वितरण कार्यक्रमके समिक्षात्मक बैठक गाउँपालिकाके अध्यक्ष राजसमझ चौधरी कैलारी गाउँपालिका सुगम जिल्लाके दुर्गम गाउँपालिकामे परल बटैलै ।
उहाँ कहलै, कैलारी गाउँपालिका विपदके दुष्टिकोणसे हेरेबेर सबसे जोखिममे रहल बा । वडा–३ शिवरत्नपुरके १६ घरपरिवारहे मोहना लडियक कटानसे घरवार विहिन बनैलै बा । वडा–७ विपतपुरमे गैल बैशाख ११ गतेक आगलागीसे २७ घर जरके पुरा खरानी हुइल बा ।’
अध्यक्ष कहलै, ‘यहाँ मोहना, कटैनी, घुराह लडियासे बर्सेनी कटान, डुबान ओ पटान करटा । यिहे अवस्था रहलेसे लडिया पारके तीनु बस्ती उठिबास हुइना अवस्था आई ।’ गैल बरसके बर्खाके बाढसे एक ठो झोलुङे पुलफे पुहाइल अध्यक्ष जनैलै ।
गाउँपालिका उपाध्यक्ष भगवतीकुमारी चौधरी बर्सेनी हुइना डुबान, कटान ओ पटानके लाग दिगो समाधान कैना जरुरी रहल बटैली । बाढके कारण किसानके उत्पादनफे घटटी रहल उहाँ बटैली ।
छलफल कार्यक्रममे कैलारी गाउँपालिका–४ अध्यक्ष तथा बन वातावरण तथा विपद व्यवस्थापन समिति संयोजक ठागुराम चौधरी कटैनी लडियाके तटियाभागमे ढेर क्षति पुगैटी रहल बटैलै । कार्यक्रममे कैलारी गाउँपालिकाके प्रमुख प्रशासकीय अधिकृत विरबहादुर ऐर, निडस नेपालके मनराज उपाध्याय, जयबहादुर महरा, वडा नम्बर १ अध्यक्ष धोजहरिपाल बोहरालगायत सहभागी रहिट । छलफल कार्यक्रममे निडस नेपालके मनराज उपाध्याय बाढ प्रभावितहुकनहे राहत डेनाके साथे बगर खेतीके लाग सहयोग करे सेक्ना बटैलै ।
