एसपीएके विद्यार्थीसे आमाको माया छात्रवासमे लाइब्रेरी स्थापना
पहुरा समाचारदाता
धनगढी, २१ कात्तिक । अभिभावकविहिन विद्यार्थीहुक्रनहे आश्रय लेटी आइल धनगढी तारानगरस्थित आमाको माया छात्रवासमे सुदूरपश्चिमाञ्चल एकेडेमी (एसपीए)के विद्यार्थीहुक्रे पुस्तकालय (लाइब्रेरी) स्थापना करले बाटै ।
एसपीएके स्नातकतहमे अध्ययनरत् विद्यार्थी रोशन खत्री, कञ्चन सावँदलगायतके टोलीसे उ लाइब्रेरी स्थापना करल हो । एसपीए कलेजके प्रबन्ध निर्देशक सुवाश शाही एक कार्यक्रमबीच सोम्मारके लाइब्रेरीके उद्घाटन करल रहिट ।
लाइब्रेरीके उद्घाटन कैटी शाही कलेज उमेरसे विद्यार्थीहुक्रे लाइब्रेरी स्थापना जैसिन सामाजिक कार्यमे लग्ना सह्रानीय काम कहटी प्रेरणादायी काम हुइल बटैलै ।
‘कलेज पह्रीबर नै सामाजके प्रभाव पर्ना लाइब्रेरी स्थापनाके सोच अइना सह्रानीय रहल बा ओ इ प्रेरणादायी काम हुइल बा,’ शाही कहलै, ‘सक्कु कलेज, स्कुलके विधार्थी इ मेरके श्रृजनात्मक काम कैना हो कलेसे समाज विकास हुइना ढिउर समय नैलागी ।’
‘समाजसे लेना प्रतिस्पर्धा ढिउर हुइल बेला देशहे का डेहे सेकजाइ कना सोच्न भावना मनसे अइना हो कलेसे देश परिवर्तन हुइना समय नैलागी,’ उहाँ कहलै, ‘लाइब्रेरी स्थापनामे हमार विद्यार्थी अग्रसरता डेखैना हमार लाग गर्वके बात हो । यम्ने हम्रे फेन सहयोग करे पाइलमे खुशी बाटी ।’
लाइब्रेरी निर्माणमे एसपीए कलेजसँगे धनगढी उपमहानगरपालिका, चौधरी बुक डिपो, इमेज बुक्स एण्ड स्टेशनरी तथा अपी इन्टरटेनमेन्टलगायत संस्थाके सहयोग रहल निर्माणकर्ता रोशन खत्री बटैलै ।
उहाँ लाइब्रेरी निर्माणके क्रममे सहयोग कैना कञ्चन सावँद, सिखा श्रेष्ठ, विवेक जोशी, सारा थापा ओ सुशील चन्दहे धन्यवाद डेटी आगामी दिनमे लाइब्रेरीहे थप विकास कैटी जैना बटैलै ।
छात्रवास प्रमुख सुवास तामाङसे छात्रवासमे रहल विद्यार्थीहुक्रनके अध्यापन अध्ययनमे सहयोग पुगैना उद्देश्यसे लाइब्रेरी स्थापना हुइलमे खुशी व्यक्त करलै । काल्हके दिनमे उहे किताब पह्रके विद्यार्थीनके उज्ज्वल भविष्य निर्माण हुइना आशा व्यक्त करलै ।
उहे कार्यक्रममे धनगढीके छठ पूजा व्यवस्थापन समितिके अध्यक्ष सन्तोष मण्डल छात्रवासमे रहल विद्यार्थीहुक्रनके भविष्य उज्ज्वलके लाग सबके दायित्व रहल ओरसे पुस्तकालय निर्माण टोलीहे धन्यवाद डेलै । उहाँ आपन ओरसे मासिक सय केजी चाउर छात्रवासहे उपलब्ध करैना प्रतिवद्धता समेत जनैलै ।
