सुप महोत्सवके १६ औं संस्करण अगहन २२ से
पहुरा समाचारदाता
धनगढी, २१ कार्तिक । कैलाली उद्योग वाणिज्य संघसे सुदुरपश्चिम महोत्सवके १६ औं संस्करण अगहन २२ से पुस २ गतेसम कैना जनैले बा ।
२०६३ सालसे सुरुवाट करल महोत्सवहे निरन्तरता डेहक लाग असौफे आयोजना कैना सोम्मारके रोज धनगढीमे आयोजित पत्रकार सम्मेलनमे जनागिल हो । सुदूरपश्चिम प्रदेशके पर्यटन, कृषि, उद्योग व्यापारके विकास तथा विस्तारके साथे संस्कृति ओ कलाके प्रवद्र्धन करटी यी क्षेत्रके समग्र विकासके सम्भावनाहे उजागर करेक लाग महोत्सवके आयोजना करे लाग संघके अध्यक्ष पुष्पराज कुवँर बटैलै । अबसिक महोत्सव धनगढी उपमहानगरपालिका वडा नं. १ पशुपति टोलमे आयोजना करे लागल उहाँ बटैलै ।
महोत्सवमे वृहत व्यवसायीक कृषि प्रदर्शनी तथा प्रतियोगिता ताजा टिना ओ कृषिमे आइल प्रविधिसंगे मच्छी, केरा, पोल्ट्री, दुग्धजन्य पदार्थ, च्याउ आदी व्यवसायहे प्रदर्शनीमे विशेष जोड डेना अध्यक्ष कुवँर बटैलै । सास्कृतिक रुपमे धनी सुदुरपश्चिमके कला संस्कृतिके संरक्षणसंगे विगतके दिनमे महोत्सवसे उत्पादन करल कलाकार आज जैसिक देश विदेशमे ख्याती कमैले बटै उहे कार्यहे निरन्तता डेटी यी क्षेत्रके कला संस्कृतिमे सम्भावना रहल ओ योगदान डेहल कलाकारहुकनहे स्टेजमे प्राथमिकता डेना कहल बा । ओस्टेक करके यी क्षेत्रके उद्यमी व्यवसाय उत्पादनहे प्राथमिकता डेना, नेपालभरसे अइना उद्योगी व्यवसायीहुकनहे सम्मानित रुपमे सहभागिता करैना कहल बा ।
महोत्सवमे अनुमानित २ करोडके लगानीमे उत्कृष्ट रूपमे सम्पन्न कैजाई कलेसे महोत्वस उद्योगी व्यवसायके १० करोड बरावरके कारोवार हुइना अनुमान करल अध्यक्ष बटैलै । सुदुरपश्चिम महोत्सव २०७९ मे कृषि, जडिबुटी, हस्तकला फर्निचर, अटोमोबाइल्स, गारमेन्ट, इलेक्टोनिकल, होटल ओ सुचना प्रविधि करके ५०० जटरा संख्याके स्टलके सहभागीता रहना बा ।
महोत्सवमे स्थानीय उत्पादन ओ महिला उद्यमीहे प्रोत्साहन कैना कहल बा कलेसे यी वर्षके महोत्सवमे करिब ५ लाख व्यक्तिसे अवलोकन कैना आयोजक अनुमान करले बा ।
महोत्सवहे भव्यरुपमे सम्पन्न कैना मुल समितिसहित २६ उप समिति बनाइल बा । संघके वरिष्ठ उपाध्यक्ष पुष्कर ओझा अब्बे मुख्य बजार फुटटी रहल ओरसे यहाँके व्यापरीनहे महोत्सवमे स्टल धरलेसे सहुलियामे स्टलके व्यवस्था कैना जनैलै ।
