डोटीमे भूकम्प, ६ जहनके मृत्यु

पहुरा समाचारदाता
धनगढी, २३ कार्तिक । भूकम्पमे परके डोटीमे ६ जहनके मृत्यु हुइल बा । बुधके रात २ः१३ मे गिल भूकम्पमे पूर्वीचौकी गाउँपालिका ३ के गैरा गाउँमे घर भसक्के ६ जहनके मृत्यु हुइल हो । वहाँ ८ ठो घर भस्कल जनागिल बा ।

भूकम्पमे परके उ ठाउँके पदम बोहराके घर भसक्के उहाँक गोसिनिया भगवतीदेवि बोहरा, उहाँक छावा ७ वर्षीय हर्क बोहरा, उहाके छाई १४ वर्षीय सीता बोहराके मृत्यु हुइल बा । ओस्टेक प्रेम बोहरा, तुलसी बोहरा ओ धनसरी बोहराके मृत्यु हुइल जिल्ला प्रहरी कार्यालय डोटीके प्रहरी नायब उपरीक्षक भोलाकुमार भट्ट बटैलैं ।

ओस्टेक, बेपत्ता २ जहनके सकुसल उद्धार करल उहाँ बटैलैं । डोटीके खप्तड राष्ट्रिय निकुञ्ज केन्द्र बनाके ६.६ म्याग्नीच्युडके भूकम्पमे पूर्वीचौकी वडा नम्बर ३ मे रहल अधिकांस घर चर्कल जिल्ला प्रहरी कार्यालय डोटी जनैले बा ।

ओस्टेक, भूकम्पमे ५ जाने घाहिल हुइल जनागिल बा । भूकम्पमे महावीर बोहरा, इन्नरी बोहरा, बिस्नादेवी बोहरा, चनादेवी बोहरा ओ धौली बोहरा बटैं । घाहिलहुकनके उपचार हुइटिरहल जनागिल बा ।