नागरिक उन्मुक्तिके उम्मेदवार चह्रना गाडीमे तोडफोड
पहुरा समाचारदाता
धनगढी, २४ कात्तिक । नागरिक उन्मुक्ति पार्टीके उम्मेदवार तथा नेताहुक्रनके चह्रना गाडीमे तोडफोड हुइल बा ।
कैलालीके धनगढी उपमहानगरपालिका १७ डुमलियामे रोकल गाडीमे बुधके दिनके तोडफोड हुइल जिल्ला प्रहरी कार्यालय कैलाली जनैले बा । जिल्ला प्रहरी कार्यालय कैलालीके प्रहरी नायव उपरीक्षक वेदप्रकाश जोशीके अनुसार बा ११ च ५८६० नम्बरके कार तोडफोड हुइल हो । पार्किङ कैके चुनावी कार्यक्रममे गैल बेला कारके सिसा फुटाइल प्रहरी जनैले बा ।
उ पार्टीके समानुपातिक ओरके प्रतिनिधि सभा सदस्य उम्मेदवार इन्दु थारु, प्रदेश सभा सदस्यके उम्मेदवार वलबहादुर साउँद, सावित्री चौधरी ओ थरुहट नेता लक्ष्मण थारु उ कार चह्रटी आइल रहिट ।
थरुहट नेता थारुके अनुसार वहाँ खोलुवाके इपारे गाडी पार्किङ कैके उपार आयोजना करल कार्यक्रममे गैल मौका छोपके अज्ञात समूहसे गाडी तोडफोड करल बटैलै । मतदान कैना पहिले नै गाडी तोडफोड कैना पक्षसे आपन हार मानसिकता प्रदर्शन करल नेता लक्ष्मण थारुके कहाइ बा ।
घटनाबारे नागरिक उन्मुक्ति पार्टीक लुम्विनी संयोजक कन्हैलाल चौधरीके अभिब्यक्ति रहल बा–‘हम्रे बुद्धके शान्ति फिलोसफीमे नेंग्टी रहल बाटी मने याद करो शान्ति भंग करुइयाहे ठिक पारक लाग बुद्ध फेन कम्फु करातेके सहारा लेहल रहिट । घर, पसल, गाडी जरा डेलै, बलात्कार करलै, टिभी चोरैलै, टेक्टर जरैलै, पसल लुट्लै । चुनावमे उठे नैडेलै । आब शान्तिपूर्ण रूपमे प्रचार प्रसारमे लागल हमार कार्यकर्ताके गाडी फेन तोडफोड करे लग्लै ।’
