घोडाघोडीमे लवाङ्गी पूजा तथा सांस्कृतिक महोत्सव हुइना
पहुरा समाचारदाता
सुखड, २४ कात्तिक । हरेक बरस जस्टे इ बरस फेन घोडाघोडीमे लवाङ्गी पुजा तथा सांस्कृतिक महोत्सव हुइना हुइल बा ।
घोडाघोडी नगरपालिका–१ मे घोडाघोडी मन्दिर परिसरमे ‘घोडाघोडी लवाङ्गी पूजा तथा सांस्कृतिक महोत्सव’ हुइना हुइल हो । घोडाघोडी तथा संस्कृति संरक्षण समाजके आयोजनामे अइना अगहन १० गतेसे १२ गतेसम उक्त महोत्सव आयोजना हुइना जनाइल बा । बिफेक रोज सुखडमे पत्रकार सम्मेलन मार्फत सांस्कृतिक महोत्सव बारे जानकारी करागिल बा ।
लवाङ्गी पुजा तथा महोत्सवके लाग तयारी सुरु करल घोडाघोडी तथा संस्कृति संरक्षण समाजके अध्यक्ष चन्द्र चौधरी जानकारी डेलै । महोत्सवमे घोडाघोडी नगरपालिका भिट्टरके ८२ गाउँके स्थानीयहुक्रनके उपस्थित हुइना बटाइल बा ।
महोत्सवमे थारु संस्कृति भल्कैना झाँकी प्रदर्शनी, राष्ट्रिय तथा स्थानीय कलाकारके प्रस्तुति सँगे थारु समुदायके भेषभुषा झल्कैना टमान नाच समेत प्रस्तुत हुइना आयोजक जनैले बा ।
कार्यक्रममे थारु समुदायके पुरान बर्का नाच, सखिया नाच, लाठी नाच, झुम्रा नाच, कठरिया नाच, दिन नचुवा नाच, धमार, मांगर लगायतके प्रस्तुती हुइना जनाइल बा ।
थारु समुदायसे घोडाघोडीमे लवाङ्गी पूजा परापूर्वक कालसे मनैटी आइल बाटै । इ पुजा विशेष कैके थारु समुदाय लावा बाली भित्र्यासेकलपाछे उक्त अन्नबालीहे प्रसादके रूपमे आपन देवी देवताहे चह्रैना करठै । यकर साथे उहे दिन पञ्चतत्व अर्थात् प्रकृतिके फेन पूजन करठै ।
लवाङ्गी पुजाके दिन घोडाघोडीके मुख्य मन्दिरमे सुवरमाकर, मुर्गीचिङ्गना, छेग्रीभेँरी लगायतके बलि समेत चह्रैना करजाइठ् । बलि डेना कार्यक्रममे थारु लगायत गैरथारु समुदायके फेन सहभागिता रहल रहठ् ।
