कैलाली–५ मे पन्तहे जिटैना आरजुसे अपिल

पहुरा समाचारदाता
धनगढी, २५ कार्तिक । नेपाली काँग्रेसके नेतृ डाक्टर आरजु राणा देउवा कैलाली क्षेत्र नम्बर ५ के प्रदेश सभा १ के चार ठाउँमे आयोजित चुनावी सभामे सम्बोधन करले बटी ।

धनगढी उपमहानगरपालिका वडा नम्बर १४ ओ १२, कैलारी गाउँपालिका वडा नम्बर ९ ओ ६ मे आयोजित चुनावी सभामे सम्बोधन करल हुइट । नेतृ देउवा नेकपा एमालेके चुनाव चिन्ह सूर्य अन्धकार हुके जैटी रहल बटैली । उहाँ कहली बहुमत प्राप्त करके सरकार चलैना नेतृत्व करल एमालेसे जनताके पक्षमे काम करे नइसेकल । अब्बे सुर्य अन्धकार हुके गैल ।

उहाँ जनताके पक्षमे काम कैना पार्टीहे मतदान कैना आग्रह करली । उहाँ कहली देश विकास, संविधानके रक्षा, लोकतन्त्रहे संस्थागत कैना गठबन्धन दलबाहेक कोई करे नइसेक्ही । टबमारे गठबन्धनके सरकार बनैना गठबन्धनके उम्मेदवारहे मतदान करके विजयी करैबी ।

नेतृ देउवासे गठबन्धन दलसे कैलाली क्षेत्र नम्बर ५ मे उम्मेदवार रहल नेपाली काँग्रेसके नेता डिल्लीराज पन्त विकास प्रेमी नेता रहल बटैली । उहाँ पन्त प्रदेश सभा सदस्य रहेबेर अपन क्षेत्रमे जनताके लाग काम करल बटैली । उहाँ कहली काँग्रेसके सरकार नइरहे । टबफे उहाँ खानेपानी, विद्यालयके भवन, तटबन्धन, सडक कालोपत्रे लगायतमे बजेट खर्च करलै । आब गठबन्धनके सरकार बन्लेसे थप बजेट ओ योजना यी निर्वाचन क्षेत्रमे अइना बा ।

उहाँ स्थानीय, प्रदेश ओ केन्द्रमे गठबन्धन सरकार आवश्यक रहल बटैली । उहाँ जातपात, भाषा, समुदायके नारामे नइलग्नाफे मतदाताहुकनसंग अनुरोध करली ।

कैलाली क्षेत्र नम्बर ५ मे प्रतिनिधि सभाके उम्मेदवार डिल्लीराज पन्त अपने जनतामे भ्रम छरके, झुठा आश्वासन डेखाके मत नइमाग्न बटैलै । उहाँ राजनीतिक यात्रासे अपन सदा जनताके सेवामे लैगिल बटैलै । उहाँ कहलै महीहे यी निर्वाचन क्षेत्रके सक्कु समस्या पत्ता बा । मै निर्वाचन जिटलेसे सदा अपनेहुकनके माझ रहम । विकासके योजना ओ बजेटके लागफे गठबन्धन सरकारहे विजयी करैना आवश्यक रहल बा ।

प्रदेश सभा १ के उम्मेदवार नेकपा माओवादीके नेता रमेश धामी योजनामे हुइना कमिशन प्रवृतिके अन्त्य कैना बटैलै । उहाँ अपने निर्वाचित हुइलेसे वडा ओ टोलके प्राथमिकताके आधारमे प्रमुख समस्याहुकनहे समाधान कैना करके काम कैना बटैलै ।

नेपाली काँग्रेसके केन्द्रिय सदस्य नृपबहादुर वड विकास ओ समृद्धिके लाग गठबन्धनके दलहे विजयी करैना आवश्यक रहल बटैलै । उहाँ उम्मेदवार पन्त नेपाल विद्यार्थी संघके संस्थापक रहल ओ पार्टीमे नम्मा समय योग्दान पुगाइल ओरसे अब्बे पार्टीसे प्रतिनिधि उम्मेदवार बनाके न्याय करल बटैलै । उहाँ नेकपा एमालेके उम्मेदवारसे झुठा योजना डेखाके मत मग्टी रहल बटैलै । चुनावी सभामे नेपाली काँग्रेसके केन्द्रीय सदस्य शुशिला मिश्र भट्ट, जीवन राना, नेपाली काँग्रेस कैलाली सभापति नारायण दत भट्ट, एकीकृत समाजवादी पार्टीके नेतृ लक्ष्मी चौधरी लगायत सम्बोधन करले रहिट ।