विदेशीके चक्रब्युहसे देश जोगैना एमालेहे मतः राना
पहुरा समाचारदाता
धनगढी,३० कार्तिक । नेकपा एमालेके पोलिट्ब्युरो सदस्य तथा पुर्व मन्त्री नारदमुनी राना विदेशीके चक्रब्युहसे देश जोगैना एमालेहे मत डेहे पर्ना बटैले बटै । अब्बे कैलाली क्षेत्र नम्बर ५ से प्रतिनिधीसभा सदस्यके उमेदवार समेत रहल राना विदेशीके इसारामे देश चल्टी रहल कारण एमाले रोज्नके विकल्प नइरहल बटाइल हुइट ।
अब्बे देश विदेशीके चक्रब्युहमे चलल कारण देश जोगैना एमाले जिटे पर्ना राना बटैलै । सक्कु नेपालीहे पत्ता हुइल बाट हो गठबन्धनके नेता भारतके निर्देशनमे नेपाली नागरिकता विदेशीहे बेच्न खोजल राना आरोप लगैलै । राष्ट्रपति विद्यादेवी भण्डारी हुइल कारण उ विधेयक प्रमाणिकरण नइकरके देश विदेशीके चक्रब्युहमे जैनासे जोगैली ।’
आब गठबन्धनके सरकार बन्न हो कलेसे ओइनके राष्ट्रपति बन्ना ओ उ विधेयक प्रमाणीकरण हुइना बा उहाँ कहलै ‘ओ धमाधम विदेशीसे नागरिकता पैही ओ विदेशीके शासन नेपालमे चली, संवैधानिक निकायमे ओइनके शासन चल्न बा, काल्ह सांसद मन्त्री समेत ओइने हुइही ओ हम्रे नेपालीके अवस्था का हुई हुई विचार करी ।’ गठबन्धनके नेता देशहे विदेशीके हातमे सुम्पे खोजल ओरसे देश जोगैना एमाले आई परल रानाके कहाई रहे ।
यहाँ नारदमुनी राना एक ठो उमेदवार हो मै हटले फरक नइपरी मने एमाले हटलेसे देशसे हारी यी बाटके ख्याल करी उहाँ कहलै ‘देश जोगैना एमाले केल हो विगतके इतिहास हेरी ओ मत दि, विकासके बाटमे एमाले बाहेक कोई करे नइसेक्की, ज्येष्ठ नागरिकके सम्मान, सुत्केरी स्याहार, विद्यार्थीके लाग प्राविधिक शिक्षा, स्वास्थ्यमे स्तरोन्नती लगायतके उल्लेख्य काम एमालेके सरकारके बेला हुइल बटै । विकास ओ सम्वृद्धिके लाग फे एमाले रहल बा ।’ देश जोगैना या देशहे अस्टे अस्थिरता ओ विदेशीके इसारामे चले नइडेना जनताके हातमे बा उ कारण जनतासे एमाले रोज्लेसे देश रहना उहाँ दावी करलै ।
