कैलाली ५ मे गठबन्धनके उम्मेदवार विजयी
पहुरा समाचारदाता
धनगढी, ९ अगहन । कैलालीके निर्वाचन क्षेत्र नम्बर ५ मे पाँच दलीय गठबन्धनके उम्मेदवार निर्वाचित हुइल बाटै । सुदूरपश्चिम प्रदेशके राजधानी रहल धनगढी शहर समेत पर्ना क्षेत्र नम्बर ५ मे पाँच दलीय गठबन्धनके प्रतिनिधिसभा ओ प्रदेशसभा सदस्यमे कांग्रेस ओ माओवादी केन्द्रके उम्मेदवार निर्वाचित हुइल हुइट ।
शुकके सकारे ओराइल कैलाली ५ के मतगणनामे प्रतिनिधिसभा ओर कांग्रेसके डिल्लीराज पन्त निर्वाचित हुइल बाटै । उहाँ २१ हजार ३९२ मत प्राप्त करले बाटै । उहाँ एमालेके उम्मेदवार नारदमुनी रानाहे १ हजार ७१ मतके अन्तरसे पराजित करल हुइट । एमालेके राना २० हजार ३१८ मत प्राप्त करल रहिट । इ निर्वाचन क्षेत्रमे प्रतिनिधिसभा ओर टिसरा स्थानमे कांग्रेसके बागी उम्मेदवार पुष्करनाथ ओझा रहिट । ओझा ८ हजार ३ सय मत प्राप्त करल रहिट । औरे स्वतन्त्र उम्मेदवार जगदीश चौधरी ७ हजार ४६० मत लानल रहिट ।
प्रदेशसभा सदस्यमे कैलाली ५ से कांग्रेस ओ माओवादीके उम्मेदवार निर्वाचित हुइल बाटै । कैलाली ५(२) से सुदूरपश्चिम प्रदेशसभा सदस्यमे कांग्रेसका प्रकाशबहादुर देउवा निर्वाचित हुइल बाटै । उहाँ ९ हजार ५९१ मत प्राप्त करले बाटै कलेसे निकटतम प्रतिद्वन्द्वी एमालेके दुर्गा जोशी ६ हजार ३५१ मत पैले बाटै ।
कैलाली ५(१) मे प्रदेशसभा सदस्यमे माओवादी केन्द्रके उम्मेदवार निर्वाचित हुइल बाटै । माओवादीके रमेश धामी ११९ मतके अन्तरसे विजयी हुइल हुइट । धामी ९ हजार ३८७ मत प्राप्त करले बाटै कलेसे ओहकान निकटतम प्रतिद्वन्द्वी एमालेके नेपालु चौधरी ९ हजार २६२ मत पाइल रहिट ।
